Prisoners escape | నాగాలాండ్ జైలు నుంచి తప్పించుకున్న 9 మంది ఖైదీలు

Prisoners escape | నాగాలాండ్లోని ఓ జిల్లా జైలు నుంచి 9 మంది ఖైదీలు తప్పించుకుని పారిపోయారు. వీరిని గుర్తించి పట్టుకునేందుకు అక్కడి పోలీసులు భారీ ఆపరేషన్‌ను చేపట్టారు. లుక్‌ అవుట్‌ నోటీసు జారీ చేశారు.

Prisoners escape | నాగాలాండ్‌ జైలు నుంచి 9 మంది ఖైదీలు తప్పించుకున్నారు. తప్పించుకున్న వారిలో అండర్‌ ట్రయల్‌ ఖైదీలు, హత్యానేరం మోపబడిన వారు ఉన్నారు. సెల్‌ కీ ని దొంగిలించిన వీరు శనివారం తెల్లవారు జామున జైలు నుంచి పారిపోయినట్లు జైలు అధికారులు ధ్రువీకరించారు. ఈ ఉదంతం ఒకరోజు ఆలస్యంగా వెలుగులోకి వచ్చింది. వీరిని గుర్తించేందుకు పోలీసులు, జైలు అధికారులు భారీ సెర్చ్‌ ఆపరేషన్‌ కొనసాగిస్తున్నారు.

మోన్‌ జిల్లా జైలు నుంచి కనీసం తొమ్మిది మంది ఖైదీలు తప్పించుకుని పారిపోయారు. వీరిని పట్టుకునేందుకు పది బృందాలు రంగంలోకి దిగాయి. దీనికి సంబంధించి సోమ పోలీస్‌ స్టేషన్‌లో జైలు అధికారులు కేసు నమోదు చేశారు. పారిపోయిన వారిని తిరిగి పట్టుకునేందుకు వివిధ ఏజెన్సీల సహకారం తీసుకుంటున్న పోలీసులు.. లుక్‌అవుట్‌ నోటీసు జారీ చేశారు. పరారీలో ఉన్న ఈ ఖైదీలకు సంబంధించి ఏదైనా సమాచారం లభిస్తే పోలీసులను సంప్రదించాలని ఖైదీల సొంతూళ్ల గ్రామ సభలకు అధికారులు సూచించారు.