నిత్య స్ఫూర్తి ఎన్టీఆర్‌

తెలుగు దిగ్గజ నటుడు ఎన్టీఆర్‌ 27వ వర్థంతి నేడు. ఈ సందర్భంగా దర్శకుడు వైవీఎస్‌ చౌదరి ఎన్టీఆర్‌ తనకు ఇచ్చిన స్ఫూర్తిని గుర్తు చేసుకున్నారు.

తెలుగు దిగ్గజ నటుడు ఎన్టీఆర్‌ 27వ వర్థంతి నేడు. ఈ సందర్భంగా దర్శకుడు వైవీఎస్‌ చౌదరి ఎన్టీఆర్‌ తనకు ఇచ్చిన స్ఫూర్తిని గుర్తు చేసుకున్నారు. ఒక అభిమానిగా ఆయన అనుభవాలను పంచుకున్నారు. వైవీఎస్‌ చౌదరి మాట్లాడుతూ…‘ఎన్టీఆర్‌ గారి నుంచి స్ఫూర్తి పొంది సినీ, రాజకీయ రంగాల్లో ఎంతోమంది జీవితాన్ని పొందారు. ఆయన అందించిన చైతన్యం వల్ల, అవకాశాల వల్ల ఎందరో గుర్తింపు తెచ్చుకున్నారు. ఎన్టీఆర్‌ సినీ, రాజకీయ రంగాల్లో ప్రతిభావంతులను గుర్తించి ప్రోత్సహించారు. వారు ఎదిగేందుకు కారణమయ్యారు. ఎన్టీఆర్‌ అభిమానిగా గుడివాడలో అభిమాన సంఘాన్ని ఏర్పాటుచేశాను.

ఆ తర్వాత పరిశ్రమకు వచ్చి దర్శకుడిగా పేరు తెచ్చుకున్నాను. ఇలా మనకు స్ఫూర్తినిచ్చిన వారి పట్ల కృతజ్ఞత ఉండాలనేది నా అభిప్రాయం. అందుకే ప్రతి ఏటా జయంతికి, వర్థంతికి ఎన్టీఆర్‌ను ప్రత్యేకంగా స్మరిస్తాను. నా సినిమా ప్రారంభ, ముగింపులు ఆయన ఫొటోతోనే ఉండటం అందరికీ గుర్తే. మా సినిమాలకు కొండంత అండగా ఎన్టీఆర్‌ ఉండాలని మా కోరిక’ అన్నారు.