ఆ కుర్ర హీరో సినిమాకు అదిరిపోయే ఆఫర్.. డిజిటల్ లో షాకింగ్ రేటు..

January 7, 2022 / 07:23 PM IST

Amritha aiyer and teja sajja in Hanuman — teja sajja

Teja Sajja Hanuman | 2-3 ఫ్లాపులు వచ్చిన తర్వాత కుర్ర హీరోల వైపు నిర్మాతలు చూడటం కష్టమే. కానీ కొందరు హీరోలు మాత్రం ఫ్లాప్‌లు వచ్చినా కూడా వరుస సినిమాలు చేస్తూనే ఉంటారు. ఆ జాబితాలోకి వచ్చే హీరో తేజ సజ్జ. 1997లో మూడేళ్ల‌ వయసులో ప్రియరాగాలు సినిమాతో ఇండస్ట్రీకి వచ్చిన ఈయన.. దాదాపు 40కి పైగానే సినిమాల్లో న‌టించాడు. బాల నటుడిగా మంచి గుర్తింపు తెచ్చుకున్నాడు తేజ సజ్జ. ముఖ్యంగా చిరంజీవి హీరోగా నటించిన ఇంద్ర సినిమాలో చిన్నప్పటి మెగాస్టార్‌గా నటించి క్రేజ్ తెచ్చుకున్నాడు. తెలంగాణ శకుంతలతో నేనున్నానే నాయనమ్మా అంటూ తొడ కొట్టి స్టార్ అయిపోయాడు తేజ. ఇప్పటికీ ఆ డైలాగ్ చెప్తుంటాడు తేజ. ఆ తర్వాత అదే ఊపులో చాలా సినిమాలు చేశాడు ఈ చిన్నోడు.

రెండేళ్ల కింద సమంత ప్రధాన పాత్రలో నందిని రెడ్డి తెరకెక్కించిన ఓ బేబీ సినిమాతో మళ్లీ పరిచయం అయ్యాడు తేజ. అందులో చాలా కీలక పాత్రలో నటించాడు తేజ. మొన్నటికి మొన్న ప్రశాంత్ వర్మ తెరకెక్కించిన జాంబి రెడ్డి సినిమాతో లీడ్ హీరోగా మారిపోయాడు. ఈ మధ్యే ఇష్క్ అనే సినిమాతో వచ్చాడు. అయితే ఈ సినిమా వచ్చి పోయినట్లు కూడా ఎవరికీ తెలియదు. తొలిరోజే డిజాస్టర్ టాక్ తెచ్చుకుని.. కనీసం కోటి రూపాయల వసూళ్లు కూడా తీసుకురాలేకపోయింది. అయినా కూడా ఈ కుర్రాడి చేతిలో ప్రస్తుతం మరో రెండు సినిమాలున్నాయి. ఈ మధ్యే అద్భుతం సినిమాతో వచ్చాడు తేజ.

ప్రశాంత్ వర్మ దర్శకత్వంలో హనుమాన్ తో పాటు మరో రెండు సినిమాలకు కమిట్ అయ్యాడు ఈ హీరో. ఇందులో హనుమాన్ సినిమాకు ప్రశాంత్ వర్మ దర్శకుడు. ఇదిలా ఉంటే తేజ రెమ్యునరేషన్ కు రెక్కలొచ్చినట్లు తెలుస్తుంది. హనుమాన్ సినిమాకు థియేట్రికల్ బిజినెస్ తో పాటు డిజిటల్, శాటిలైట్ అన్నీ కలిపి రూ.13 కోట్ల వరకు జరుగుతుందని అంచనా. ఈ కుర్రాడు సినిమాకు కోటి రూపాయల పారితోషికం అందుకుంటున్నట్లు ప్రచారం జరుగుతుంది. నిర్మాతలు కూడా అన్ని లెక్కలు వేసుకున్న తర్వాత సరే ఇవ్వొచ్చు అనే నిర్ణయానికి వచ్చినట్లు తెలుస్తుంది. ఏదేమైనా చాలా వేగంగా ఎదుగుతున్నాడు కానీ అంతే వేగంగా కింద పడిపోకుండా జాగ్రత్త పడాల్సిన అవసరం తేజకు ఎంతైనా ఉంది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి