Visit:
Yash | రాకింగ్ స్టార్ యష్ హీరోగా గీతూ మోహన్దాస్ దర్శకత్వంలో తెరకెక్కిన గ్యాంగ్స్టర్ డ్రామా ‘టాక్సిక్: ఎ ఫెయిరీ టెల్ ఫర్ గ్రోన్-అప్స్’ బాక్సాఫీస్ వద్ద దూసుకుపోతోంది. సినిమాలోని హింసాత్మక సన్నివేశాలు, రొమాంటిక్ ట్రాక్స్ మరియు మహిళలను చూపించిన విధానంపై సోషల్ మీడియాలో విమర్శలు, ట్రోలింగ్ వస్తున్నప్పటికీ కలెక్షన్లపై మాత్రం ఎలాంటి ప్రభావం పడలేదు. విడుదలైన కేవలం 4 రోజుల్లోనే ఈ చిత్రం ప్రపంచవ్యాప్తంగా రూ. 254.75 కోట్ల గ్రాస్ కలెక్షన్లను రాబట్టి సంచలనం సృష్టిస్తోంది.
తాజా నివేదిక ప్రకారం ఈ సినిమా నాల్గవ రోజు దేశవ్యాప్తంగా సుమారు రూ. 24.50 కోట్ల నెట్ కలెక్షన్లను సాధించింది. దీంతో భారత్లో నాలుగు రోజుల మొత్తం నెట్ కలెక్షన్లు రూ. 190.45 కోట్లకు చేరగా, ఇండియా గ్రాస్ కలెక్షన్లు రూ. 227.50 కోట్లకు చేరుకున్నాయి. శుక్రవారంతో పోలిస్తే శనివారం దేశీయ వసూళ్లలో సుమారు 9.9 శాతం స్వల్ప తగ్గుదల కనిపించినప్పటికీ, వీకెండ్ కావడంతో వసూళ్లు పటిష్టంగానే సాగాయి. ఇక ఓవర్సీస్లో శనివారం రూ. 4 కోట్లు రాబట్టడంతో, విదేశీ గడ్డపై మొత్తం కలెక్షన్లు రూ. 27.25 కోట్లకు తాకాయి.
కాగా, ఆగస్టు 26న కన్నడ, హిందీ, తమిళం, తెలుగు, మలయాళం మరియు ఇంగ్లీష్ భాషల్లో ప్రేక్షకుల ముందుకు వచ్చిన ఈ చిత్రంలో హుమా ఖురేషి, రుక్మిణి వసంత్, తారా సుతారియా, నయనతార మరియు కియారా అద్వానీ కీలక పాత్రల్లో నటించారు.
