Yash | రావణ పాత్రకోసం కసరత్తులు చేస్తున్న యష్‌

రణబీర్‌కపూర్‌, సాయిపల్లవి ప్రధాన పాత్రల్లో నటిస్తున్న ‘రామాయణ’ సినిమా షూటింగ్‌ ఇటీవలే ముంబయిలో మొదలైన విషయం తెలిసిందే.

Yash | రణబీర్‌కపూర్‌, సాయిపల్లవి ప్రధాన పాత్రల్లో నటిస్తున్న ‘రామాయణ’ సినిమా షూటింగ్‌ ఇటీవలే ముంబయిలో మొదలైన విషయం తెలిసిందే. ఈ చిత్రంలో సీతారాముల పాత్రల్లో సాయిపల్లవి, రణబీర్‌కపూర్‌ నటిస్తుండగా, రావణాసురుడి పాత్రను కన్నడ అగ్ర హీరో యష్‌ పోషిస్తున్నారు. నితీష్‌ తివారి దర్శకత్వంలో రూపొందుతున్న ఈ సినిమాపై దేశవ్యాప్తంగా అంచనాలున్నాయి.

ఇదిలావుండగా రావణుడి పాత్ర కోసం యష్‌ ఇప్పటి నుంచే కసరత్తులు చేస్తున్నట్లు తెలిసింది. కాస్త భారీకాయంతో కనిపించేందుకు ఆయన 20 కిలోల బరువు పెరగాలని నిర్ణయించుకున్నారట. ఇప్పటికే ఈ దిశగా ఆయన ప్రయత్నాలు మొదలు పెట్టారని అంటున్నారు. ప్రస్తుతం యష్‌ ‘టాక్సిక్‌’ అనే చిత్రంలో నటిస్తున్నారు. ఇది పూర్తయిన తర్వాతే ఆయన ‘రామాయణ’ సెట్‌లోకి అడుగుపెట్టబోతున్నారు. ప్రస్తుతం ముంబయిలో వేసిన అయోధ్య సెట్‌లో ఈ సినిమా చిత్రీకరణ జరుగుతున్నది. సాయిపల్లవి జూన్‌లో షూటింగ్‌లో జాయిన్‌ కానుంది.