Vidya Balan | తాను మాత్రమే చేయగలిగిన పాత్రలను ఎంచుకొని మరీ నటించే గొప్ప నటి విద్యాబాలన్. తనుంటే హీరోతో పనిలేదు. సినిమా మొత్తాన్ని భుజంపై మోసేంత కెపాసిటీ ఉన్న హీరోయిన్ తను. సినీ పరిశ్రమపై ఆమెకంటూ కొన్ని కచ్చితమైన అభిప్రాయాలున్నాయి. వాటిని సందర్భం వచ్చినప్పుడు కుండ బద్దలుకొట్టి మరీ చెప్పడం విద్యాబాలన్ స్పెషాలిటీ. తాజాగా ఓ ఆంగ్ల మీడియా ఇంటర్వ్యూలో బాలీవుడ్పై ఆసక్తికరంగా మాట్లాడారు విద్యాబాలన్. ‘ బాలీవుడ్లో బంధుప్రీతి ఎక్కువ అనే అభిప్రాయం చాలామందిలో ఉంది. నేనైతే దాన్ని ఒప్పుకోను. అదే ఉంటే హీరోల పిల్లలందరూ సక్సెస్ అయ్యేవారుకదా!? ఇక్కడ టాలెంట్ ముఖ్యం.
ఉదాహరణకు నన్నే తీసుకోండి. నాకెలాంటి సినీ నేపథ్యం లేదు. కిందస్థాయి నుంచి కష్టపడి పైకి వచ్చాను. అందుకే ప్రేక్షకులు నన్ను చూసే దృక్కోణం భిన్నంగా ఉంటుంది. అదే నా వెనుక ఏదైనా స్టార్ ఫ్యామిలీ ఉంటే, నన్ను మరోలా చూసేవారేమో. ఇప్పుడున్న నా స్థాయి, అవకాశాలు.. ఇవన్నీ నా నటన చూసే వచ్చాయి.’ అంటూ చెప్పుకొచ్చింది విద్యాబాలన్. ఇంకా మాట్లాడుతూ ‘నేను ్రస్త్రీ ప్రాధాన్యతా చిత్రాల్లో ఎక్కువ నటిస్తుంటాను. వాటిని ప్రేక్షకులు కూడా బాగానే ఆదరిస్తుంటారు. కొందరు హీరోలకు అది నచ్చదు. అందుకే నా పక్కన నటించడానికి వాళ్లు ఇష్టపడరు. దానికి నేనేం బాధపడను. ఇది కూడా ఓ విధంగా గౌరవంగానే భావిస్తా’ అంటూ అందంగా నవ్వేశారు విద్యాబాలన్.