నేర ప్రపంచం కథ

రామ్స్‌, శ్వేతావర్మ జంటగా నటిస్తున్న చిత్రం ‘పచ్చీస్‌’. శ్రీకృష్ణ, రామసాయి దర్శకత్వం వహిస్తున్నారు. కత్తూరి కౌశిక్‌కుమార్‌, రామసాయి నిర్మాతలు. ఈ చిత్ర ట్రైలర్‌ను బుధవారం హీరో రానా విడుదలచేశారు. సులభంగా డబ్బు సంపాదించాలని కలలుకన్న ఓ యువకుడు అనుకోకుండా నేరప్రపంచంలోకి ఎలా అడుగుపెట్టాడనే అంశాలతో ట్రైలర్‌ రియలిస్టిక్‌గా సాగింది. దర్శకద్వయం మాట్లాడుతూ ‘రాకేష్‌ అనే యువకుడి కథ ఇది. ఓ నేరం నుంచి బయటపడే క్రమంలో అతడికి ఎలాంటి పరిణామాలు ఎదురయ్యాయన్నది ఆసక్తికరంగా ఉంటుంది. టాలీవుడ్‌లో పలువురు ప్రముఖులకు డిజైనర్‌గా పనిచేస్తున్న రామ్స్‌ ఈ సినిమాతో హీరోగా పరిచయం అవుతున్నారు. ఈ నెల 12న అమెజాన్‌ ప్రైమ్‌ ద్వారా ఈ చిత్రం విడుదలకానుంది’ అని తెలిపారు. ఈ చిత్రానికి కెమెరామెన్‌: కార్తిక్‌, సంగీతం: సమ్రాన్‌ సాయి.