తెలుగు ఇండస్ట్రీలోనే కాదు.. అన్ని ఇండస్ట్రీలలో కూడా ఎప్పటికప్పుడు ట్రెండ్స్ మారిపోతుంటాయి.. కొత్తవి మొదలవుతుంటాయి. వాటిని ఎవరో ఒకరు కొత్తగా పరిచయం చేస్తూనే ఉంటారు. అలా ఇప్పుడు తెలుగు ఇండస్ట్రీలో ఉన్న నయా ట్రెండ్ ఇన్స్టాగ్రామ్లోని ఫిట్నెస్ రీల్స్ ! ఇన్స్టా రీల్స్ చాలా రోజులుగా చేస్తూనే ఉన్నారు. టిక్ టాక్ బ్యాన్ అయిపోయిన తర్వాత అంతా ఇన్స్టా రీల్స్ పైనే పడ్డారు. ఇప్పుడు వాటినే కాస్త కొత్తగా పరిచయం చేశాడు అల్లు శిరీష్. మన హీరోలకు జిమ్ అంటే ఎంత యిష్టమో ప్రత్యేకంగా చెప్పనక్కర్లేదు. ఈ కరోనా టైమ్లో చాలా మంది ఎక్కువగా జిమ్లోనే కాలం గడుపుతున్నారు. అక్కడే ఉండి ఇన్స్టా రీల్స్ పోస్ట్ చేస్తున్నారు. వీటిని అల్లు శిరీష్ మొదటగా తెలుగు ఇండస్ట్రీకి పరిచయం చేశాడు. ఇప్పుడు వీటిని అంతా ఫాలో అవుతున్నారు.
కొన్ని రోజుల కింద ఫిట్ నెస్ ట్రైనింగ్ పేరుతో వీడియోలు మొదలు పెట్టాడు అల్లు వారబ్బాయి. అందులో ట్రైనింగ్ క్లాసులు కూడా ఇస్తున్నాడు ఈయన. ఫిట్గా ఉండటానికి తాము ఎంత కష్టపడుతున్నాం.. ఏం చేస్తున్నామనేది అభిమానుల ముందు పెట్టాడు శిరీష్. తమ హార్డ్ వర్క్ వీడియోల రూపంలో షూట్ చేసి.. వాటికి తగ్గట్లుగా సౌండ్ యాడ్ చేయించి తమ ఇన్ స్టాలో రీల్స్గా అప్లోడ్ చేస్తున్నాడు శిరీష్. వీటికి మంచి రెస్పాన్స్ కూడా వస్తుంది. ఇప్పుడు అల్లు వారబ్బాయి మొదలు పెట్టిన ఈ ట్రెండ్నే మిగిలిన స్టార్స్ ఫాలో అవుతున్నారు. ఈ మధ్యే విజయ్ దేవరకొండ కూడా తన అభిమానుల కోసం లైగర్ ఫిట్నెస్ వీడియోను అప్లోడ్ చేశాడు. ఆ తర్వాత మెగా హీరో వరుణ్ తేజ్ కూడా తన ఇన్స్టా ఫిట్నెస్ రీల్ అప్లోడ్ చేశాడు. గని కోసం బరువు తగ్గి.. మిస్టర్ ఫిట్గా రెడీ అయ్యానని వరుణ్ తేజ్ కూడా ఓ స్పెషల్ ఇన్ స్టా ఫిట్నెస్ రీల్లో చూపించాడు.
తాజాగా హీరోయిన్ రాశీ ఖన్నా సైతం ఈ ఫిట్ నెస్ ట్రెండ్ ఫాలో అయిపోయింది. తన నాజుకు నడుము అందాలతో పాటు మెరుపుతీగ లాంటి బాడీని కూడా వీడియో చేసి పోస్ట్ చేసింది. ఒకప్పుడు హాలీవుడ్లో ఈ ఫిట్ నెస్ రీల్స్ ట్రెండ్ ఎక్కువగా ఉండేది. ఆ తర్వాత అది నెమ్మదిగా బాలీవుడ్ వైపు వచ్చింది. తాజాగా అల్లు శిరీష్ పుణ్యమా అని టాలీవుడ్లోనూ బాగానే ట్రెండ్ అవుతుంది.