Shiraz Mehdi | టాలీవుడ్‌లో చిన్న సినిమాల పరిస్థితి రెడ్ అలర్ట్.. పుట్టిన‌రోజున‌ హీరో, దర్శకుడు షిరాజ్ మెహదీ ఆవేదన

Shiraz Mehdi | పుట్టినరోజు వేడుకల వేళ ఆనందంగా ఉండాల్సిన నటుడు, దర్శకుడు షిరాజ్ మెహదీ తన సినిమా విడుదలకు ఎదురవుతున్న అడ్డంకులను ప్రస్తావిస్తూ తీవ్ర ఆవేదన వ్యక్తం చేశారు.

పుట్టినరోజు వేడుకల వేళ ఆనందంగా ఉండాల్సిన నటుడు, దర్శకుడు షిరాజ్ మెహదీ తన సినిమా విడుదలకు ఎదురవుతున్న అడ్డంకులను ప్రస్తావిస్తూ తీవ్ర ఆవేదన వ్యక్తం చేశారు. తాను ఎంతో కష్టపడి రూపొందించిన ‘ఓ అందాల రాక్షసి’ చిత్రానికి థియేటర్లు కేటాయించడం లేదని, దీనివల్ల చిన్న సినిమాల మనుగడ ప్రశ్నార్థకంగా మారుతోందని ఆరోపించారు. బంజారాహిల్స్‌లోని ‘అఆ సినీ స్టూడియోస్‌’లో మీడియా సమక్షంలో నిర్వహించిన తన పుట్టినరోజు వేడుకలు మరియు ప్రెస్‌మీట్‌లో తెలుగు చిత్ర పరిశ్రమలో చిన్న సినిమాలు ఎదుర్కొంటున్న పలు సమస్యలను ఆయన వివరించారు.

ప్రస్తుతం టాలీవుడ్‌లో చిన్న సినిమాల పరిస్థితి ఆందోళనకరంగా ఉందని షిరాజ్ మెహదీ పేర్కొన్నారు. నిర్మాతలు, దర్శకులు, నటీనటులు, సాంకేతిక నిపుణులు ఎంతో శ్రమించి సినిమాలు రూపొందించినా, వాటిని ప్రేక్షకుల ముందుకు తీసుకెళ్లేందుకు సరైన అవకాశాలు లభించడం లేదని వాపోయారు. వంద సినిమాలు విడుదలైతే కేవలం రెండు, మూడు చిత్రాలకే ఎక్కువ ప్రాధాన్యం దక్కుతోందని, మిగిలిన సినిమాలు థియేటర్ల సమస్యతో తీవ్ర ఇబ్బందులు పడుతున్నాయని తెలిపారు. పెట్టుబడులు తిరిగి రాక నిర్మాతలు ఆర్థికంగా నష్టపోతున్నారని, ఇతర ఆదాయ మార్గాలు కూడా అందుబాటులో లేకపోవడంతో పరిశ్రమలో తీవ్ర అనిశ్చితి నెలకొందని ఆందోళన వ్యక్తం చేశారు.

తన సినిమా ‘ఓ అందాల రాక్షసి’ విడుదల కోసం గత కొంతకాలంగా ప్రయత్నిస్తున్నప్పటికీ ఆశించిన స్థాయిలో థియేటర్లు దక్కలేదని చెప్పారు. గత నాలుగైదేళ్లుగా చిన్న సినిమాలకు థియేటర్ల కేటాయింపు చాలా కష్టంగా మారిందని, హైదరాబాద్‌లోనూ పరిమిత సంఖ్యలో స్క్రీన్లు మాత్రమే లభిస్తున్నాయని ఆరోపించారు. థియేటర్లలో ప్రదర్శనకు సంబంధించిన వివరాలు చివరి నిమిషం వరకు తెలియకపోవడం వల్ల నిర్మాతలు అనేకసార్లు నష్టపోతున్నారని తెలిపారు. అలాగే తన చిత్రానికి ఆడియో, ఓటీటీ, శాటిలైట్ మరియు ఇతర భాషల హక్కుల విషయంలోనూ ఆశించిన స్పందన లభించలేదని పేర్కొన్నారు.

చిన్న సినిమాల సమస్యలపై పలుమార్లు ప్రెస్‌మీట్లు, ఇంటర్వ్యూల ద్వారా తన గోడు వెళ్లబోసుకున్నప్పటికీ ఫిల్మ్ ఛాంబర్ నుంచి కనీస స్పందన రాలేదని షిరాజ్ మెహదీ విమర్శించారు. సంబంధిత సంస్థలు, సినీ ప్రముఖులకు ఫిర్యాదులు చేసినా ఎలాంటి పరిష్కారమూ లభించలేదన్నారు. న్యాయం కోసం న్యాయపరమైన మార్గాలను ఆశ్రయించినా ఫలితం దొరకలేదని, గత ఏడాదిన్నరగా తాను ఒంటరి పోరాటం చేస్తున్నానని స్పష్టం చేశారు. చిన్న నిర్మాతలకు న్యాయం జరిగే వరకు తన ఈ పోరాటాన్ని ఆపేది లేదని తేల్చిచెప్పారు.

ఊటీలో గ్రాడ్యుయేషన్ పూర్తి చేసిన తర్వాత దుబాయ్‌లో హాస్పిటాలిటీ మేనేజ్‌మೆಂಟ್ అభ్యసించి, ఆపై దర్శకత్వంలో శిక్షణ తీసుకుని తాను సినీ పరిశ్రమలోకి వచ్చానని షిరాజ్ మెహదీ వివరించారు. ‘పాడుచీకటి’, ‘కేఎస్ 100’, ‘యు ఆర్ మై హీరో’, ‘పౌరుషం’, ‘ఓ అందాల రాక్షసి’ వంటి చిత్రాలతో తన ప్రయాణాన్ని కొనసాగిస్తున్నానని చెప్పారు. పరిశ్రమలో నిర్మాతలు, ఎగ్జిబిటర్లు, నటీనటులు, టెక్నీషియన్లు అందరికీ సమన్యాయం జరిగే ఆరోగ్యకరమైన వ్యవస్థ రావాలని అభిప్రాయపడ్డారు.

చిన్న సినిమాల కష్టాలపై తెలంగాణ ముఖ్యమంత్రి రేవంత్‌రెడ్డి ప్రత్యేకంగా దృష్టి సారించాలని షిరాజ్ మెహదీ విజ్ఞప్తి చేశారు. థియేటర్ల కేటాయింపు, సినిమా విడుదల మరియు ఇతర హక్కుల సమస్యలపై ప్రభుత్వం స్పందించి చిన్న నిర్మాతలకు అండగా నిలవాలని కోరారు. పరిశ్రమలో ఆరోగ్యకరమైన పోటీకి అవకాశం కల్పించి, మంచి సినిమాలు రూపొందించే వారికి సరైన వేదికలు దక్కేలా విధానపరమైన మార్పులు తీసుకురావాలని ఆయన కోరారు.