Rashmika Mandanna | పుష్ప 2 సినిమా కోసం ఫ్యాన్స్ చాలా ఆత్రుతగా ఎదురుచూస్తున్నారు. కేవలం టాలీవుడ్లోనే కాదు.. దేశవ్యాప్తంగా ఉన్న సినీ అభిమానులంతా ఈ సినిమా కోసం వెయిట్ చేస్తున్నారు. నిజానికి ఇప్పటికే ఈ సినిమా విడుదల కావాల్సి ఉన్నా.. పలు కారణాల వల్ల చిత్రీకరణ ఆలస్యమయ్యింది. దీంతో శరవేగంగా సినిమా షూటింగ్ కంప్లీట్ చేయాలని చిత్ర యూనిట్ ప్రయత్నిస్తోంది. ఈ క్రమంలోనే ఇప్పుడు పుష్పరాజ్ లీకుల బెడదను ఎదుర్కొంటోంది. ఎంత పకడ్బందీగా జాగ్రత్తలు తీసుకున్నా కానీ.. సినిమాకు సంబంధించిన ఫొటోలు బయటకు వచ్చేస్తున్నాయి. ఇలా తమ సినిమాను టార్గెట్ చేసిన లీకువీరులపై నేషనల్ క్రష్ రష్మిక మందన సీరియస్ అయ్యారు.
పుష్ప 2 సినిమా షూటింగ్ స్పాట్ నుంచి ఇటీవల రెండు ఫొటోలు లీకయ్యాయి. ఒక దాంట్లో అల్లు అర్జున్ చీర కట్టుకున్నట్లుగా ఉన్న లుక్ బయటకు రాగా.. భారీగా నగలు ధరించిన రష్మిక ఫొటో కూడా ఒకటి బయటకు వచ్చింది. ఇలా ఒక్కో సీన్కు సంబంధించిన ఫొటోలు లీకవ్వడంపై రష్మిక మంధన అసహనం వ్యక్తం చేశారు. షూటింగ్ సెట్ నుంచి నటీనటుల ఫొటోలు లీక్ చేయడం కరెక్ట్ కాదని సూచించింది. ఈ సినిమా చూడాలని ఇంకా ఎంతోమంది ఎదురుచూస్తున్నారని.. అలా అని లీకైన ఫొటోలను షేర్ చేయడం మంచిది కాదని చెప్పింది. ఇలా సినిమాకు సంబంధించిన ఫొటోలను ముందే చూసేస్తే.. తర్వాత మూవీ విడుదలయ్యాక ఏమాత్రం ఆసక్తి ఉండదని తెలిపింది. థియేటర్లో ప్రేక్షకులకు 100 శాతం వినోదాన్ని పంచేందుకు సినిమా యూనిట్ అంతా కష్టపడుతున్నారని.. దయచేసి తమ సినిమా ప్రైవసీకి భంగం కలిగించవద్దని సూచించింది.