టీఎఫ్‌సీసీ కార్యవర్గ ప్రమాణ స్వీకారం

తెలంగాణ ఫిల్మ్‌ ఛాంబర్‌ ఆఫ్‌ కామర్స్‌ (టీఎఫ్‌సీసీ) కార్యవర్గ సభ్యుల ప్రమాణ స్వీకారోత్సవం ఆదివారం హైదరాబాద్‌లో జరిగింది. ఈ కార్యక్రమానికి సినిమాటోగ్రఫీ శాఖా మంత్రి కోమటిరెడ్డి వెంకట్‌ రెడ్డి ముఖ్య అతిథిగా హాజరయ్యారు.

తెలంగాణ ఫిల్మ్‌ ఛాంబర్‌ ఆఫ్‌ కామర్స్‌ (టీఎఫ్‌సీసీ) కార్యవర్గ సభ్యుల ప్రమాణ స్వీకారోత్సవం ఆదివారం హైదరాబాద్‌లో జరిగింది. ఈ కార్యక్రమానికి సినిమాటోగ్రఫీ శాఖా మంత్రి కోమటిరెడ్డి వెంకట్‌ రెడ్డి ముఖ్య అతిథిగా హాజరయ్యారు. ఈ సందర్భంగా టీఎఫ్‌సీసీ అధ్యక్షుడు ప్రతాని రామకృష్ణగౌడ్‌ మాట్లాడుతూ ‘టీఎఫ్‌సీసీ సంస్థ సొంత భవనం కోసం ఫిల్మ్‌నగర్‌లో స్థలం ఇప్పించాలని, అలాగే చిత్రపురి కాలనీలో మా సభ్యులకు ఇల్లు మంజూరు చేయించాలని మంత్రిగారిని కోరుతున్నా. చిన్న సినిమాలకు థియేటర్లు ఇవ్వడం లేదు.

ఈ విషయంలో కూడా మంత్రిగారు చొరవ తీసుకొని సమస్యను పరిష్కరించాలని విజ్ఞప్తి చేస్తున్నా’ అన్నారు. మంత్రి కోమటి రెడ్డి వెంకట్‌రెడ్డి మాట్లాడుతూ ‘టీఎఫ్‌సీసీకి ఆరోసారి ఛైర్మన్‌గా ఎన్నికైనా ప్రతాని రామకృష్ణగౌడ్‌ను అభినందిస్తున్నా. తెలంగాణలో సినిమా పరిశ్రమ అభివృద్ధి చెందాలన్నదే మా ప్రభుత్వ లక్ష్యం. ఆ దిశగా ప్రయత్నాలు చేస్తున్నాం. చిత్రపురి కాలనీలో కొత్తగా కట్టబోయే ఫ్లాట్స్‌లో తెలంగాణవారికి ఇళ్లు ఇప్పిస్తాం’ అని చెప్పారు. ఈ కార్యక్రమంలో ప్రసాద్‌ సంస్థల అధినేత రమేష్‌ప్రసాద్‌తోపాటు తెలంగాణ ఫిల్మ్‌ ఛాంబర్‌ ఆఫ్‌ కామర్స్‌ కార్యవర్గ సభ్యులందరూ పాల్గొన్నారు.