పెళ్లెందుకు బాబోయ్.. సోలో బ్రతుకే సో బెటర్ అంటున్న యువ హీరో

September 2, 2021 / 09:02 PM IST

ఒక వయసు వచ్చిందంటే చాలు.. కచ్చితంగా అందరు అడిగే ఒకే మాట పెళ్లి ఎప్పుడు..? దానికి సమాధానం చెప్పే వరకు ఎవ్వరూ వదిలిపెట్టరు. అదే సెల‌బ్రెటీల విష‌యంలో అయితే ఇది ఇంకా ఎక్కువ‌గా ఉంటుంది. ఒక్కోసారి వీళ్ల పెళ్లిళ్ల‌పై పుకార్లు కూడా వ‌స్తుంటాయి. ఈ క్ర‌మంలోనే తాజాగా ఓ హీరో క‌మ్ డైరెక్ట‌ర్ ద‌గ్గ‌ర పెళ్లి గురించి ప్ర‌స్తావన రావ‌డంతో ఓపెన్ అయ్యాడు. సోలో బ్రతుకే సో బెటర్.. జీవితంలో పెళ్లి చేసుకోను అంటూ కుండబద్దలు కొట్టాడు. ఆయనెవరో కాదు అవసరాల శ్రీనివాస్.

నూటొక్క జిల్లాల అందగాడు సినిమాతో ఈ వారం ప్రేక్షకుల ముందుకు వస్తున్నాడు అవసరాల. దిల్ రాజు, క్రిష్ నిర్మించిన ఈ సినిమాపై అంచనాలు కూడా బాగానే ఉన్నాయి.ఈ సినిమాకు కథ కూడా ఆయనే అందించాడు. అతని స్నేహితుడు దాచకుండా విద్యాసాగర్ దర్శకుడు. ఈ సినిమా ప్రమోషన్‌లో భాగంగా ఇచ్చిన ఇంటర్వ్యూలో తన పెళ్లి టాపిక్ వచ్చింది. దానికి ఏ మాత్రం మొహమాట పడకుండా సమాధానం చెప్పాడు అవసరాల శ్రీనివాస్. మీరు పెళ్లి ఎప్పుడు చేసుకోబోతున్నారు అంటే.. జీవితంలో పెళ్లి చేసుకోను.. సోలో బ్రతుకే సో బెటర్ అంటూ సమాధానమిచ్చాడు. దానికి తన పర్సనల్ కారణాలు తనకు ఉన్నాయంటూ చెప్పుకొచ్చాడు అవసరాల శ్రీనివాస్. ఒంటరిగా ఉండటంలోనే తనకు సంతోషంగా ఉందన్నాడు ఈయన.
జీవితంలో పెళ్లి చేసుకోకూడద‌ని నిర్ణయం తీసుకున్నట్లు చెప్పాడు. తన నిర్ణయంలో ఎలాంటి మార్పు ఉండదని కూడా క్లారిటీ ఇచ్చాడు అవసరాల శ్రీనివాస్.

అమెరికాలో ఉద్యోగం చేసుకునే అవ‌స‌రాల‌.. సినిమాలపై మక్కువతో ఇండ‌స్ట్రీకి వ‌చ్చాడు. అష్టా చ‌మ్మా సినిమాతో ఇండ‌స్ట్రీకి వ‌చ్చిన ఆయ‌న‌.. న‌టుడిగా, క‌మెడియ‌న్‌గా మంచి గుర్తింపు తెచ్చుకున్నాడు. ఊహలు గుసగుసలాడే సినిమాతో దర్శకుడిగా మారి తనలోని మరో కోణాన్ని ప్రేక్షకులకు పరిచయం చేశాడు. ఆయన తెరకెక్కించిన రెండో సినిమా జో అచ్యుతానంద కూడా బాగానే ఆడింది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి