డాక్టర్ కాబోయి యాక్టర్ అయ్యామని చెబుతుంటారు కొందరు తారలు. ఈ నానుడి పరిశ్రమలో ఎప్పటి నుంచో ఉంది. అందాల తార, దివంగత శ్రీదేవి తనయ జాన్వీకపూర్ సైతం తన తల్లి కోరిక మేరకు డాక్టర్ కావాలనుకుందట. అయితే వైద్య విద్యను అభ్యసించే తెలివితేటలు తన వద్ద లేవని చెప్పడంతో కుటుంబ సభ్యులు సినిమాల్లోకి వెళ్లడానికి ఒప్పుకున్నారట. ఇటీవల ఇచ్చిన ఓ ఇంటర్వ్యూలో ఈ విషయాన్ని వెల్లడించింది జాన్వీకపూర్. ‘అమ్మ నన్ను డాక్టర్గా చూడాలని ఎన్నో కలలు కన్నది. నా కాలేజీ రోజుల్లో ఎప్పుడూ అదే విషయాన్ని ప్రస్తావించేది. సినీ వాతావరణంలో పెరగడం వల్ల నాకు చిన్నతనం నుంచే నటనపై ఆసక్తి కలిగింది. నాకున్న ప్రతిభ వైద్య వృత్తికి సరిపోదని తేల్చిచెప్పడంతో చివరకు సినిమాల్లోకి వెళ్లడానికి ఒప్పుకుంది. నేను డాక్టర్ కావాలనుకున్న అమ్మ కల తీర్చలేకపోయా’ అని చెప్పింది జాన్వీకపూర్. ‘ధడక్’ చిత్రంతో బాలీవుడ్లో అరంగేట్రం చేసిన జాన్వీకపూర్ అనతికాలంలోనే ప్రతిభావంతురాలైన నాయికగా గుర్తింపును తెచ్చుకుంది. ప్రస్తుతం భారీ చిత్రాల్లో నటిస్తూ బిజీగా ఉంది.