తండ్రీకొడుకుల బంధంతో

కిరణ్‌ అబ్బవరం, ప్రియాంక జవాల్కర్‌ జంటగా నటిస్తున్న చిత్రం ‘ఎస్‌ఆర్‌కల్యాణమండపం’. ప్రమోద్‌, రాజు నిర్మిస్తున్నారు. శ్రీధర్‌ గాదే దర్శకుడు. బుధవారం హైదరాబాద్‌లో ఈ చిత్ర ట్రైలర్‌ను నటుడు సాయికుమార్‌ విడుదలచేశారు. ఈ సందర్భంగా ఆయన మాట్లాడుతూ “పోలీస్‌స్టోరీ’, ‘ప్రస్థానం’ చిత్రాలు నా సినీ జీవితాన్ని మలుపుతిప్పి నటుడిగా నాకు ఎనలేని గుర్తింపును తీసుకొచ్చాయి. సెకండ్‌ ఇన్నింగ్స్‌లో ఆ స్థాయిలో నాకు పేరుతెచ్చిపెట్టే సినిమా ఇది. తండ్రీకొడుకుల అనుబంధంతో వినోదం, సెంటిమెంట్‌ కలబోతగా ఉంటుంది’ అని అన్నారు. ‘కుటుంబ సమేతంగా చూసే చిత్రమిది. రాయలసీమ బ్యాక్‌డ్రాప్‌లో ఓ పెళ్లిమండపం నేపథ్యంలో సాగుతుంది. తండ్రి గొప్పతనాన్ని ఓ కొడుకు ఎలా గుర్తించాడు? తండ్రి కలను అతడు ఏ విధంగా సాకారం చేశాడనే పాయింట్‌తో హృద్యంగా ఉంటుంది. సాయికుమార్‌ పాత్ర సినిమాకు ప్రధానాకర్షణగా నిలుస్తుంది. ఆగస్ట్‌ 6న థియేటర్స్‌లో ఈ సినిమాను విడుదలచేస్తున్నాం’ అని కిరణ్‌ అబ్బవరం తెలిపారు. ఈ కార్యక్రమంలో నిర్మాతలు పాల్గొన్నారు.