రవన్న దావత్‌ ఇస్తుండు..

జయాపజయాలతో నిమిత్తం లేకుండా వరుసపెట్టి సినిమాలు చేసుకుంటూ వెళ్లడం రవితేజ ైస్టెల్‌. ఆయన కెరీర్‌లో ప్రతిష్టాత్మకంగా చెప్పుకునే 75వ చిత్రానికి రంగం సిద్ధమైంది.

జయాపజయాలతో నిమిత్తం లేకుండా వరుసపెట్టి సినిమాలు చేసుకుంటూ వెళ్లడం రవితేజ ైస్టెల్‌. ఆయన కెరీర్‌లో ప్రతిష్టాత్మకంగా చెప్పుకునే 75వ చిత్రానికి రంగం సిద్ధమైంది. రచయిత భాను భోగవరపుని దర్శకునిగా పరిచయం చేస్తూ, సితార ఎంటర్‌టైన్‌మెంట్స్‌, ఫార్చూన్‌ ఫోర్‌ సినిమాస్‌ పతాకాలపై సూర్యదేవర నాగవంశీ, సాయిసౌజన్య ఈ చిత్రాన్ని నిర్మించనున్నారు.

వచ్చే ఏడాది సంక్రాంతికి విడుదల కానున్న ఈ సినిమా పోస్టర్‌ని ఉగాది సందర్భంగా విడుదల చేశారు. ఓ జాతరను ఎస్టాబ్లిష్‌ చేస్తూ సృజనాత్మకంగా ఈ పోస్టర్‌ని మేకర్స్‌ డిజైన్‌ చేశారు. ఇది రవితేజ 75వ చిత్రం అని తెలిపే విధంగా ఈ పోస్టర్‌లో కళ్లద్దాలపై ‘ఆర్‌టీ 75’ అని రాయడం విశేషం. అలాగే తెలంగాణ మాండలీకంలో ‘రవన్న దావత్‌ ఇస్తుండు.. రెడీ అయిపోండ్రి.. హ్యాపీ ఉగాది రా బయ్‌’ అని రాసి ఉండటం గమనార్హం. పోస్టర్‌ పోకడను బట్టి ఇది తెలంగాణ నేపథ్యంతో కూడిన సినిమా అని తెలుస్తున్నది.

ఇందులో రవితేజ పాత్ర పేరు ‘లక్ష్మణ్‌ భేరి’. ఆ కేరక్టరైజేషన్‌ని ఉగాది పంచాంగం రూపంలో పోస్టర్‌ ద్వారా చెబుతూ.. ‘ఆదాయం.. చెప్పను తియ్‌. ఖర్చు.. లెక్క జెయ్యన్‌. రాజ్యపూజ్యం.. అన్‌ లిమిటెడ్‌. అవమానం.. జీరో’ అంటూ రవితేజ ైస్టెల్‌లో చెప్పిన తీరు బావుంది. ఈ చిత్రానికి కెమెరా: కార్తీక్‌ ఘట్టమనేని, సంగీతం: భీమ్స్‌ సిసిరోలియో, ఎడిటింగ్‌: నవీన్‌ నూలి, సమర్పణ: శ్రీకర స్టూడియోస్‌.