Republic Review | రిపబ్లిక్ సినిమాలో చెప్పాలనుకున్న కంటెంట్ పబ్లిక్‌కు రీచ్ అయిందా..?

October 1, 2021 / 08:00 PM IST

Republic Movie Review | ఒక బలమైన కథ చెప్పాలంటే బలమైన కథానాయకుడు కావాలి. దర్శకుడు కూడా తాను చెప్పాలనుకున్న పాయింట్ పక్కదారి పట్టకుండా చెప్పగలగాలి. అప్పుడే ఆ కథకు న్యాయం జరుగుతుంది. కమర్షియల్ కోణంలో ఆలోచించి ఏ మాత్రం పక్కదారి పట్టినా రాసుకున్న కథకు న్యాయం చేయలేడు దర్శకుడు. ఈ విషయం దేవా కట్టా కు బాగా తెలుసు. ఈయన ఎలాంటి సినిమాలు తీస్తాడో ప్రేక్షకులకు తెలుసు. దాదాపు పదేళ్లుగా కెరీర్‌లో ఒక్క హిట్ కూడా లేదు. ఇలాంటి సమయంలో వరుస విజయాలతో జోరు మీదున్న సాయి ధరమ్ తేజ్ దేవా కట్టా ను నమ్మి అవకాశం ఇచ్చాడు. రిపబ్లిక్ కథ సాయి ధరమ్ తేజ్ కి బాగా నచ్చి చేశాడు. ఈ నమ్మకాన్ని దాదాపు నిలబెట్టుకున్నాడు దేవా కట్టా.

కమర్షియల్ కోణంలో ఆలోచించకుండా దర్శకుడికి కావాల్సిన ఫ్రీడం ఇచ్చాడు సాయి ధరమ్ తేజ్ . దాని ఫలితం ఇప్పుడు రిపబ్లిక్ సినిమా రూపంలో కనిపిస్తుంది. కుళ్లు పట్టిన వ్యవస్థను ప్రశ్నించే సినిమా రిపబ్లిక్ అంటూ విశ్లేషకులు కూడా దీనిపై ప్రశంసల వర్షం కురిపిస్తున్నారు. కమర్షియల్‌గా ఈ సినిమా సేఫ్ అవుతుందా లేదా అనే విషయం పక్కన పెడితే కచ్చితంగా సాయి ధరమ్ తేజ్ కెరీర్‌లో మాత్రం రిపబ్లిక్ ఒక మంచి సినిమా అవుతుంది అనడంలో ఎలాంటి సందేహం లేదు. అలాగే దర్శకుడు దేవా కట్టా కూడా తాను చెప్పాలనుకున్న కంటెంట్ సుత్తి లేకుండా సూటిగా చెప్పాడు. మనం ఎలాంటి వ్యవస్థలో బతుకుతున్నాం అనేది ఒప్పుకోలేనంత పచ్చిగా చూపించాడు దేవా కట్టా.

ఈ క్రమంలోనే రిపబ్లిక్ సినిమాలో కమర్షియల్ ఎలిమెంట్స్ దూరమయ్యాయి. అయినా ఎక్కడా కాంప్రమైజ్ కాకుండా తన కథను చెప్పాడు దేవా కట్టా. అయితే మరింత పకడ్బందీ స్క్రీన్ ప్లే రాసుకొని ఉండుంటే కచ్చితంగా రిపబ్లిక్ మరింత మంచి సినిమా అయ్యుండేది. రమ్యకృష్ణ, ఐశ్వర్య రాజేశ్‌ క్యారెక్టర్స్ బలంగా అనిపించినా కథలో అంతర్లీనంగా బలంగా అనిపించలేదు. కొన్ని చోట్ల వాళ్ల‌ పాత్రలు తేలిపోయాయి. ఓవరాల్‌గా రిపబ్లిక్ సినిమాతో దేవాకట్టా ఇవ్వాలనుకున్న మెసేజ్ సగం వరకే రీచ్ అయింది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి