RC 17 | రామ్ చరణ్-సుకుమార్ ‘ఆర్‌సీ17’లో విజయ్ సేతుపతి.. కీలక పాత్రపై ఆసక్తికర ప్రచారం!

RC 17 | తెలుగు సినీ పరిశ్రమలో ‘రంగస్థలం’ ఎలాంటి సంచలనం సృష్టించిందో ప్రత్యేకంగా చెప్పాల్సిన అవసరం లేదు. మెగా పవర్ స్టార్ రామ్ చరణ్‌లోని నటుడిని సరికొత్తగా ఆవిష్కరించిన దర్శకుడు సుకుమార్.. ఈ చిత్రంతో బాక్సాఫీస్ వద్ద భారీ విజయాన్ని అందుకున్నారు. ఇప్పుడు దాదాపు ఎనిమిదేళ్ల తర్వాత ఈ విజయవంతమైన కలయిక మరోసారి ప్రేక్షకుల ముందుకు రానుండటంతో వీరి కొత్త సినిమాపై భారీ అంచనాలు నెలకొన్నాయి

RC 17 | తెలుగు సినీ పరిశ్రమలో ‘రంగస్థలం’ ఎలాంటి సంచలనం సృష్టించిందో ప్రత్యేకంగా చెప్పాల్సిన అవసరం లేదు. మెగా పవర్ స్టార్ రామ్ చరణ్‌లోని నటుడిని సరికొత్తగా ఆవిష్కరించిన దర్శకుడు సుకుమార్.. ఈ చిత్రంతో బాక్సాఫీస్ వద్ద భారీ విజయాన్ని అందుకున్నారు. ఇప్పుడు దాదాపు ఎనిమిదేళ్ల తర్వాత ఈ విజయవంతమైన కలయిక మరోసారి ప్రేక్షకుల ముందుకు రానుండటంతో వీరి కొత్త సినిమాపై భారీ అంచనాలు నెలకొన్నాయి. ఈ నేపథ్యంలో ‘ఆర్‌సీ17’లో ఓ కీలక పాత్ర కోసం తమిళ స్టార్ నటుడు విజయ్ సేతుపతిని సంప్రదిస్తున్నారనే ప్రచారం ఆసక్తిని రేకెత్తిస్తోంది.‘రంగస్థలం’లో రామ్ చరణ్ పోషించిన చిట్టిబాబు పాత్ర ఎంతటి గుర్తింపు తెచ్చుకుందో, ఆది పినిశెట్టి నటించిన కుమార్ బాబు పాత్ర కూడా కథలో అంతే కీలకంగా నిలిచింది. ఇప్పుడు ‘ఆర్‌సీ17’లోనూ కథను మలుపు తిప్పే ఓ బలమైన పాత్రను సుకుమార్ రూపొందిస్తున్నట్లు సినీ వర్గాల్లో ప్రచారం జరుగుతోంది.

ఈ పాత్ర కోసం తొలుత తమిళ చిత్ర పరిశ్రమకు చెందిన ఓ సీనియర్ స్టార్ హీరోను సంప్రదించాలని భావించినట్లు, అయితే పారితోషికానికి సంబంధించిన అంశాల కారణంగా ఆ ప్రయత్నం ముందుకు సాగలేదని సమాచారం. దీంతో సహజమైన‌ నటనకు కేరాఫ్ అడ్రెస్‌గా మారిన‌ విజయ్ సేతుపతిని ఎంపిక చేసే ఆలోచనలో చిత్ర బృందం ఉన్నట్లు వార్తలు వినిపిస్తున్నాయి. భావోద్వేగ సన్నివేశాలను సహజంగా పండించడంలో విజయ్ సేతుపతి ప్రత్యేక గుర్తింపు సంపాదించుకున్నారు. ఆయన ఈ ప్రాజెక్టులో భాగమైతే సినిమాకు మరింత బలం చేకూరుతుందని అభిమానులు భావిస్తున్నారు. గతంలో ‘సైరా నరసింహారెడ్డి’, ‘ఉప్పెన’ చిత్రాలతో తెలుగు ప్రేక్షకులకు దగ్గరైన ఆయన.. ప్రస్తుతం పలు చిత్రాలతో బిజీగా ఉన్నారు. అయితే ‘ఆర్‌సీ17’లో విజయ్ సేతుపతి నటిస్తున్నారనే విషయంపై చిత్ర బృందం నుంచి అధికారిక ప్రకటన రావాల్సి ఉంది.

మరోవైపు, ‘పెద్ది’ తర్వాత రామ్ చరణ్ తదుపరి చిత్రం కోసం అభిమానులు ఆసక్తిగా ఎదురుచూస్తున్నారు. సుకుమార్ దర్శకత్వంలో తెరకెక్కనున్న ఈ భారీ చిత్రాన్ని మైత్రీ మూవీ మేకర్స్, సుకుమార్ రైటింగ్స్ సంయుక్తంగా నిర్మించనున్నట్లు సమాచారం. ఈ సినిమా ప్రారంభోత్సవాన్ని నవంబర్ 1న నిర్వహించనున్నట్లు నిర్మాణ సంస్థకు చెందిన వై. రవిశంకర్ వెల్లడించినట్లు కథనాలు పేర్కొంటున్నాయి. ప్రస్తుతం ఈ చిత్రానికి సంబంధించిన ముందస్తు నిర్మాణ పనులు వేగంగా సాగుతున్నట్లు తెలుస్తోంది. ఇందులో రామ్ చరణ్‌ను గతంలో ఎన్నడూ చూడని రీతిలో, మాస్‌ ప్రేక్షకులను ఆకట్టుకునే గ్రామీణ నేపథ్యంతో కూడిన తీవ్రమైన పాత్రలో చూపించనున్నారనే ప్రచారం ఉంది. అయితే కథ, నటీనటులు, పాత్రల వివరాలపై అధికారిక సమాచారం వెలువడాల్సి ఉంది.