Animal | అప్పటివరకు టాలీవుడ్ సినిమాలు ఓ మూస ధోరణిలో వెళ్తున్నాయి. అప్పుడే ‘అర్జున్ రెడ్డి’ సినిమా టాలీవుడ్లో ఓ ట్రెండ్ సెట్ చేసింది. గతంలో ‘శివ’కి ముందు శివ తర్వాత అనే విధంగా ఇప్పుడు ‘అర్జున్ రెడ్డి’కి ముందు అర్జున్ రెడ్డి తర్వాత అని పిలుస్తున్నారు. టాలీవుడ్ గేమ్ చేంజర్గా ఈ చిత్రం నిలిచింది. సందీప్ రెడ్డి విజన్కు, టేకింగ్కు సినీప్రముఖులు సైతం ఆశ్చర్యంలో పడ్డారు. 2017లో విడుదలైన ఈ చిత్రం బాక్సాఫీస్ దగ్గర భారీ విజయం సాధించింది. ఈ చిత్రం తర్వాత సందీప్ ఎలాంటి కథతో ప్రేక్షకుల ముందుకు వస్తాడో అని ఆసక్తి నెలకొంది. కానీ సందీప్ అర్జున్ రెడ్డి చిత్రాన్ని హందీలో షాహిద్ కపూర్తో రీమేక్ చేస్తున్నట్లు ప్రకటించాడు. ఇక బాలీవుడ్లో ఈ చిత్రం కలెక్షన్ల ప్రభంజనం సృష్టించింది. ఈ చిత్రంతో షాహిద్ రూ.300కోట్ల క్లబ్లో అడుగుపెట్టాడు.
ఈ చిత్రం తర్వాత రన్బీర్ కపూర్తో ‘యానిమల్’ సినిమా చేయనున్నట్లు ప్రకటించాడు. ఈ చిత్రం ఫస్ట్లుక్ పోస్టర్ విడుదలైనప్పటి నుంచి ప్రేక్షకులలో భారీ స్థాయిలో అంచనాలు నెలకొన్నాయి. ఇటీవలే ఈ చిత్ర షూటింగ్ కాశ్మీర్లో ప్రారంభమైంది. తాజాగా ఈ చిత్రానికి సంబంధించిన ఓ వార్త నెట్టింట వైరల్గా మారింది. ఈ చిత్రం హిందీతో పాటు తెలుగు, తమిళం భాషల్లో కూడా విడుదల చేయాలని మేకర్స్ ప్లాన్ చేస్తున్నారట. దీనిపై మేకర్స్ నుంచి అధికారికంగా ప్రకటన రావాల్సి ఉంది. రష్మిక మందన్న హీరోయిన్గా నటిస్తున్న ఈ చిత్రంలో అనీల్ కపూర్, బాబీ డియోల్ కీలకపాత్రల్లో నటిస్తున్నారు. టీ సిరీస్, భద్రకాళి పిక్చర్స్ బ్యానర్లపై భూషన్ కుమార్, కృష్ణకుమార్, మురద్ కేతని, ప్రణయ్ రెడ్డి వంగా సంయుక్తంగా నిర్మిస్తున్నారు.