Puneeth Rajkumar James Movie | ఏడాది కింది వరకు పునీత్ రాజ్ కుమార్ సినిమా కన్నడ విడుదలైతే ఒక సెలబ్రేషన్.. కానీ ఇప్పుడు మాత్రం ఒక ఎమోషన్. కోట్లాది మంది అభిమానులను సంపాదించుకున్న ఈ హీరో గతేడాది అక్టోబర్ 29న అనూహ్యంగా గుండెపోటుతో మరణించిన సంగతి తెలిసిందే. పునీత్ మరణం తర్వాత కర్ణాటకలో చోటు చేసుకున్న సంఘటనల గురించి కూడా ప్రత్యేకంగా చెప్పాల్సిన అవసరం లేదు. ఆయన మరణవార్త విని తట్టుకోలేక 21 మంది అభిమానులు చనిపోయారు. దాన్ని బట్టి ఆయన ఎంత పెద్ద హీరో అనేది మనకు అర్థం అవుతుంది. చాలా రోజుల తర్వాత కర్ణాటకలో మరోసారి పునీత్ స్మరణ జరుగుతుంది. దానికి కారణం మార్చి 17న ఆయన జయంతి. దాంతో అభిమానులు ఎమోషనల్ అవుతున్నారు.
ఆరోజు కేవలం ఆయన జయంతి మాత్రమే కాదు పునీత్ నటించిన చివరి సినిమా జేమ్స్ విడుదల కూడా. ఇప్పటికే విడుదలైన ఈ సినిమా టీజర్, పాటలకు అద్భుతమైన రెస్పాన్స్ వచ్చింది. యూ ట్యూబ్లో రికార్డులు క్రియేట్ చేస్తోంది జేమ్స్. ఇదిలా ఉంటే ఈ సినిమాను తెలుగు, హిందీ, తమిళ, మలయాళ భాషల్లో కూడా ఒకే రోజు విడుదల చేస్తున్నారు. కన్నడలో అయితే ఇప్పటి వరకు మరే సినిమాకు సాధ్యం కాని రీతిలో జేమ్స్ సినిమాను రిలీజ్ చేస్తున్నారు దర్శక నిర్మాతలు. మొదటి రోజు ఏకంగా 4 వేల షోలు పడబోతున్నాయి.
మార్చి 16 అర్ధరాత్రి నుంచే హంగామా మొదలు కానుంది. రికార్డు స్థాయిలో ప్రీమియర్ షోస్ కూడా ప్రదర్శిస్తున్నారు. ఇప్పటికే తొలి మూడు రోజుల టికెట్స్ అన్ని హాట్ కేకుల్లా అమ్ముడుపోయాయి. అయితే ఇతర భాషల్లో మాత్రం ఈ సినిమాపై పెద్దగా అంచనాలు లేవు.. కానీ పునీత్ రాజ్ కుమార్ చివరి సినిమా అనే బ్రాండ్ మాత్రం ఉంది. దానివల్ల ఏవైనా ఓపెనింగ్స్ వస్తాయి అనేది చూడాలి. మొత్తానికి చాలా రోజుల తర్వాత మళ్లీ ఒక భారీ సినిమా విడుదల అవుతుండటం.. అందులోనూ అది పునీత్ రాజ్ కుమార్ చివరి సినిమా కావడంతో ఎమోషన్, సెలబ్రేషన్ రెండు కలిపి వస్తున్నాయి.