మరణానంతరం పునీత్ రాజ్‌కుమార్ మరో అరుదైన ఘనత..

December 11, 2021 / 07:52 PM IST

Puneeth rajkumar | చూస్తుండగానే కన్నడ పవర్ స్టార్ పునీత్ రాజ్‌కుమార్ మరణించి 50 రోజులు దాటిపోయింది. అక్టోబర్ 29న ఈయన అక‌స్మాత్తుగా గుండెపోటుతో మరణించారు. ఆయన చనిపోయిన తర్వాత దాదాపు నెల రోజుల వరకు క‌న్న‌డిగులు కోలుకోలేకపోయారు. ఎక్కడ చూసినా కూడా పునీత్ నామస్మరణే కనిపించింది. ముఖ్యంగా అభిమానులు అయితే ఇప్పటికీ ఆ షాక్ నుంచి బయటికి రాలేకపోతున్నారు. అప్పు లేడన్న నిజాన్ని.. వాళ్లు జీర్ణించుకోలేకపోతున్నారు. ఇదిలా ఉంటే ఈ మధ్యే ఈయన నటించిన చివరి సినిమా గందధ గుడి టీజర్ విడుదలైంది. దానికి అద్భుతమైన రెస్పాన్స్ వస్తుంది. అడవులు, జంతువుల పరిరక్షణ కోసం పునీత్ చేసిన సినిమా ఇది. దీన్ని సినిమా అనేకంటే కూడా డాక్యుమెంటరీ అంటే కరెక్ట్ అనిపిస్తుంది. అయితే పునీత్ మరణం తర్వాత ఈ డాక్యుమెంటరీని సినిమాగా మార్చేశారు. వచ్చే ఏడాది ఈ సినిమా థియేటర్స్ లో విడుదల కానుంది. దీనికోసం పునీత్ అభిమానులు వేయి కళ్లతో వేచి చూస్తున్నారు.

ఇదిలా ఉంటే పునీత్ రాజ్‌కుమార్ మరణించిన తర్వాత అతడిని చాలా అరుదైన గౌరవాలు పలకరిస్తున్నాయి. ఇప్పటికే కర్ణాటక ప్రభుత్వం బసవ శ్రీ, కర్ణాటక రత్న అవార్డులు ఇచ్చి సత్కరించారు. ఇవి కన్నడిగులకు ఇచ్చే అత్యున్నత పురస్కారాలు. ఆ తర్వాత పద్మ శ్రీ కూడా ఇవ్వాలని కేంద్ర ప్రభుత్వాన్ని కోరుతున్నారు. తాజాగా మరో అరుదైన ఘనత సాధించాడు పునీత్ రాజ్‌కుమార్. 2021లో అత్యధికంగా వీకిపీడియాలో వెతికిన పర్సనాలిటీగా పునీత్ నిలిచాడు. ఈ ఏడాది ప్రేక్షకులు అత్యధికంగా వెతికిన స్టార్ పునీత్ మాత్రమే. ఆయన చనిపోయిన తర్వాత ప్రతి ఒక్కరు పునీత్ రాజ్‌కుమార్ గురించి తెలుసుకోడానికి వికీ వైపు పరుగులు తీశారు. అందుకే 2021లో ఈ అరుదైన ఘనత సాధించాడు ఈయన. ఈ విషయం తెలిసి పునీత్ అభిమానులు ఓ వైపు గర్వంగా.. మరోవైపు ఎమోషనల్‌గా ఫీల్ అవుతున్నారు.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి