రిస్క్‌ చేస్తేనే విజయాలు వరిస్తాయి!’

‘నిర్మాతలుగా ఏడాదికి ఐదారు సినిమాలు చేస్తూ బాగా డబ్బులు సంపాదించాలనే ఆలోచన లేదు. సార్వజనీన కథాంశాలతో కూడిన మంచి సినిమాలు చేయాలన్నదే మా సంకల్పం’ అని అన్నారు రాజ్‌, డీకే. డీ2ఆర్‌ ఇండీ బ్యానర్‌పై వారు నిర్మించిన తాజా చిత్రం ‘సినిమాబండి’. ప్రవీణ్‌ దర్శకుడు. వికాస్‌ వశిష్ట, సందీప్‌ వారణాసి ప్రధాన పాత్రల్లో నటించారు. ఇటీవల నెట్‌ఫ్లిక్స్‌ ఓటీటీ ద్వారా ఈ చిత్రం విడుదలైంది. ఈ సందర్భంగా రాజ్‌, డీకే ‘నమస్తే తెలంగాణ’తో ముచ్చటించారు.

• మా కష్టాల్ని గుర్తుకుతెచ్చింది

అంచనాలకు మించి సినిమాకు ఆదరణ లభిస్తోంది. తెలుగుతో పాటు ఇతర భాషల వారు రియలిస్టిక్‌గా సినిమాను తెరకెక్కించామని ప్రశంసిస్తున్నారు. కొత్త ప్రతిభను, యూనిక్‌ కాన్సెప్ట్‌ను నమ్మి చేసిన ఈ సినిమా విజయవంతం కావడం ఆనందంగా ఉంది. రెగ్యులర్‌ కమర్షియల్‌ హంగులు లేకుండా ప్రేక్షకులు ఎంజాయ్‌ చేసే మంచి కథను చెప్పాలనే మా ప్రయత్నం ఫలించింది. పల్లెటూరి వాతావరణం, సినిమా తీయడానికి ప్రధాన పాత్రలు పడిన కష్టాలు నవ్విస్తూనే హృదయాల్ని హత్తుకుంటున్నాయి.
రిస్క్‌ తీసుకుంటేనే..
ఈ సినిమా ద్వారా దర్శకుడు ప్రవీణ్‌, రచయిత వసంత్‌, సంగీత దర్శకుడు శిరీష్‌తో పాటు పది మంది కొత్తవాళ్లను పరిచయం చేశాం. నటీనటులంతా సహజమైన అభినయాన్ని కనబరిచారు. ఔత్సాహిక ప్రతిభతో పాటు వైవిధ్యమైన కథాంశాలను ప్రోత్సహించాలనే ఆలోచనతోనే డీ2ఆర్‌ ఇండీ బ్యానర్‌ను ప్రారంభించాం. రిస్క్‌ తీసుకున్నప్పుడే ప్రేక్షకుల్ని మెప్పించగలమని మేము నమ్ముతాం. సక్సెస్‌, లాభాలు అనే అంశాల్ని పక్కనపెట్టి కొత్తదనంతో కూడిన సినిమాలు మాత్రమే నిర్మించాలనుకుంటున్నాం. నిర్మాతలుగా కేవలం డబ్బులు పెట్టడమే కాకుండా సినిమా బాగా రావడానికి స్క్రిప్ట్‌ నుంచి ఎడిటింగ్‌, ఫైనల్‌ కాపీ వరకు ప్రతి విషయంలో మేము ఇన్‌వాల్వ్‌ అవుతాం.
ఆ ధోరణి మారింది
మూడేళ్ల ముందు ‘ఫ్యామిలీమాన్‌’ వెబ్‌సిరీస్‌ చేయాలనుకున్నప్పుడు సినిమా దర్శకులుగా గొప్ప పేరున్న మీరు వెబ్‌సిరీస్‌ చేయడమేంటి? మీ ఇమేజ్‌ను తగ్గించుకోవద్దు అని చాలా మంది విమర్శించారు. భవిష్యత్తు మొత్తం ఓటీటీలదే అని మేము బలంగా నమ్మి రూపొందించాం.ఆ సిరీస్‌ విజయంతో ప్రతి ఒక్కరి ఆలోచన ధోరణి మారింది. ప్రస్తుతం ఓటీటీలో నటించడానికి బాలీవుడ్‌ స్టార్స్‌ అందరూ రెడీగా ఉన్నారు. తెలుగులో సిరీస్‌లకు ఆదరణ పెరగడానికి కొంత సమయం పడుతుంది.తెలుగు సినిమాకు దర్శకత్వం వహించే ఆలోచన ఉంది. మేము దర్శకత్వం వహించిన ‘ఫ్యామిలీమ్యాన్‌-2’ వెబ్‌సిరీస్‌ను జూన్‌లో విడుదలచేసేందుకు సన్నాహాలు చేస్తున్నాం ప్రస్తుతం షాహిద్‌కపూర్‌, రాశీఖన్నాలతో వెబ్‌సిరీస్‌ తెరకెక్కిస్తున్నాం. మరికొన్ని వెబ్‌సిరీస్‌లతో పాటు సినిమాలు చేసేందుకు సన్నాహాలు జరుగుతున్నాయి.