Cinema Theaters | కొవిడ్ వల్ల కుదేలైన ఎన్నోరంగాలు ఇప్పుడిప్పుడే కోలుకుంటున్నాయి. కొవిడ్ కాకలో ఉండగానే సినీరంగాన్ని ఓటీటీ తీసిన దెబ్బ అంతా ఇంతా కాదు. పులి మీద పుట్రలా కరోనా కారణంగా థియేటర్లకు దూరమైన ప్రేక్షకులను ఓటీటీ ఇంటిపట్టునే ఉండేలా చేసింది. కొవిడ్ సమసిపోయినా ఓటీటీకి మరిగిన ప్రేక్షకులు థియేటర్లపై మోజు తగ్గించుకున్నారన్నది వాస్తవం.
అయితే, తాజా సర్వే సినీజనాలకు ఊరటనిస్తున్నది. యువ ప్రేక్షకులు థియేటర్లకు రావడానికి మోజు చూపుతున్నారని ‘బుక్ మై షో’ నిర్వహించిన సర్వేలో తేటతెల్లమైంది. దాదాపు 650 నగరాల్లో దీనిని నిర్వహించగా జెనరేషన్ జెడ్లో 41 శాతం మంది, మిలీనియల్స్లో 59 శాతం మంది మంచి సినిమాను థియేటర్లో చూడటానికే ఆసక్తి కనబరిచారు. ఎంత ఓటీటీ వచ్చినా.. టాకీస్లో చూసినప్పుడు కలిగే అనుభూతి వేరని వాళ్లు చెప్పుకొచ్చారు.
అంతేకాదు, కాలక్షేపానికి ఎంచుకునే మార్గాల్లో సినిమాదే అగ్రతాంబూలమని అభిప్రాయపడ్డారు. సర్వేలో పాల్గొన్నవారిలో దాదాపు 90 శాతం మంది థియేటర్లో సినిమా చూడటానికి ఇష్టం వ్యక్తం చేశారు. అంతేకాదు, ముందస్తుగా సినిమా ప్లాన్ చేసుకుంటున్న వాళ్ల శాతం 74గా నమోదైంది. భాషతో సంబంధం లేకుండా వీకెండ్ మంచి సినిమా చూస్తే చాలనుకుంటున్న వారి సంఖ్య 34 శాతంగా ఉంది. మొత్తంగా యంగ్తరంగ్ల సినిమా అభిమానం కారణంగా ఇండస్ట్రీకి గడ్డురోజులు తప్పాయని తెలుస్తున్నది. ఈ గజిబిజి జీవితంలో సినిమాను మించిన ఎంటర్టైన్మెంట్ ఏముంటుంది చెప్పండి?