Ameer Log | ఒకేసారి మూడు ఓటీటీల్లోకి ‘అమీర్ లోగ్’.. స్ట్రీమింగ్ ఎక్కడంటే?

Ameer Log OTT | టాలీవుడ్‌లో సరికొత్త ప్రయోగాలతో వస్తున్న చిన్న చిత్రాలు ఓటీటీ ప్రేక్షకులను ఎంతగానో అలరిస్తున్నాయి. పెద్దగా అంచనాలు లేకుండా, పూర్తిగా నూతన నటీనటులతో తెరకెక్కిన విభిన్నమైన కామెడీ డ్రామా సినిమా 'అమీర్ లోగ్'.

Ameer Log OTT | టాలీవుడ్‌లో సరికొత్త ప్రయోగాలతో వస్తున్న చిన్న చిత్రాలు ఓటీటీ ప్రేక్షకులను ఎంతగానో అలరిస్తున్నాయి. పెద్దగా అంచనాలు లేకుండా, పూర్తిగా నూతన నటీనటులతో తెరకెక్కిన విభిన్నమైన కామెడీ డ్రామా సినిమా ‘అమీర్ లోగ్’. రమణా రెడ్డి సోమ దర్శకత్వంలో రూపొందిన ఈ చిత్రం గత నెల 21వ తేదీన థియేటర్లలోకి వచ్చి నిశ్శబ్దంగా ప్రేక్షకులను పలకరించింది. అయితే ఆ సమయంలో సరైన ప్రమోషన్స్ లేకపోవడం, అదే సమయంలో రవితేజ ‘ఇరుముడి’ సినిమా ప్రభావం గట్టిగా ఉండటంతో ఈ చిత్రం థియేట్రికల్ రన్‌లో పెద్దగా బజ్ సృష్టించలేకపోయింది. చాలామంది ప్రేక్షకులకు ఈ సినిమా థియేటర్లలో రిలీజైన సంగతి కూడా తెలియదు. అయితే, ఈ చిన్న సినిమా ఇప్పుడు ఏకకాలంగా మూడు ప్రముఖ ఓటీటీ ప్లాట్‌ఫారమ్‌లలోకి అడుగుపెట్టి రికార్డు సృష్టించింది. ప్రస్తుతం ఈ చిత్రం ‘ఆహా’, ‘అమెజాన్ ప్రైమ్ వీడియో’, ‘సన్ నెక్స్ట్’ ఓటీటీలలో స్ట్రీమింగ్‌కు అందుబాటులో ఉంది.

క‌థ విష‌యానికి వ‌స్తే.. హైదరాబాద్‌లోని ఓ అందమైన బస్తీ నేపథ్యంతో ఈ కథ సాగుతుంది. జీవితంపై ఎలాంటి పెద్ద లక్ష్యాలు లేకుండా, జులాయిగా తిరిగే ముగ్గురు ప్రాణ స్నేహితులు శ్రీను (MC హరి), ఫరూక్ (మనోజ్), మల్లేశ్ (శశిధర్) కథే ఈ చిత్రానికి ప్రధాన కేంద్రం. ఏ పనీ చేయకుండా తిరుగుతూ, తాగుతూ కాలం వెళ్లదీస్తున్న వీరికి, అదే బస్తీకి చెందిన నజీర్ (సాయియోగి)తో క్రికెట్ విషయంలో తీవ్రమైన గొడవ జరుగుతుంది. ఈ ముగ్గురి దయనీయ పరిస్థితిని చూసిన బస్తీ అమ్మాయి గీత (వేద జలంధర్).. వీళ్లను తమ్ముళ్లుగా భావించి సరైన దారిలో నడవాలని, జీవితంలో స్థిరపడాలని హితబోధ చేస్తుంది. ఆమె సహాయంతో శ్రీను చివరకు ఒక ఆఫీస్‌లో ఆఫీస్ బాయ్‌గా చిన్న ఉద్యోగంలో చేరుతాడు.

అయితే, తన ఆఫీస్ కొలీగ్స్‌తో సరదాగా క్రికెట్ ఆడిన శ్రీను.. అనుకోకుండా ఒక పంతానికి పోయి, “మా బస్తీ వాళ్లు మీకంటే చాలా బాగా ఆడతారు” అంటూ సవాలు విసిరి భారీ బెట్ కడతాడు. ఆ ప్రతిష్టాత్మక మ్యాచ్‌లో బస్తీ టీమ్ విజయం సాధించిందా లేదా? ఆ యువకుల జీవితాలను చక్కదిద్దడంలో బస్తీలోని పెద్దాయన చాచా (విశ్వేందర్) పాత్ర ఎలాంటిది? ఈ కథలోకి ఊహించని విధంగా ‘బిర్యానీ’ కాన్సెప్ట్ ఎలా ప్రవేశించింది? గీత ప్రియుడు రవి (రావణ్) ఎంట్రీ వల్ల ఆ ముగ్గురు స్నేహితుల జీవితాల్లో ఎలాంటి ఊహించని మలుపులు వచ్చాయి? అనే ఆసక్తికరమైన అంశాలతో ఈ సినిమా సాగుతుంది. హైదరాబాద్ నగర వాతావరణం, బస్తీ నేపథ్యంలో సాగే సహజమైన సంభాషణలు, ఫ్రెండ్స్ మధ్య ఉండే సరదా గొడవలతో ఈ సినిమా యూత్‌కు బాగా కనెక్ట్ అవుతుంది. వీకెండ్‌లో సరదాగా టైమ్ పాస్ చేయాలనుకునేవారికి ఈ కామెడీ డ్రామా ఒక మంచి ఛాయిస్ అని చెప్పవచ్చు.