Moosewala song | పంజాబీ గాయకుడు సిద్ధూ ముసేవాలా రెండో పాట ఇవాళ గురునానక్ దేవ్ ప్రకాష్ పర్వ్ సందర్భంగా విడుదలైంది. మూసేవాలా యూట్యూబ్ ఛానెల్లో మంగళవారం ఉదయం 10:02 గంటలకు ‘వార్’ పాటను రిలీజ్ చేశారు. పాట లింక్ విడుదలైన అతి తక్కువ సమయంలో 1.96 లక్షల లైక్స్, 1.69 వ్యూస్ సంపాదించింది. విడుదలైన 20 నిమిషాల్లోనే 10.94 లక్షల మంది ఈ పాటను వినడం విశేషం. ఈ పాటను మూసేవాలా అధికారిక ఇన్స్టాగ్రాం హ్యాండిల్లో కూడా షేర్ చేశారు.
సిద్ధూ మూసేవాలా హత్యానంతరం విడుదలైన మొదటి పాట ‘ఎస్ఐఎల్- సట్లజ్ యమునా లింక్ కెనాల్’.. పంజాబీ సంగీత రికార్డులను బద్దలు కొట్టింది. ఎంతో మందిని ఆకట్టుకున్న ఈ పాటను.. కొన్ని చట్టపరమైన సమస్యల కారణంగా భారత ప్రభుత్వం వీడియో స్ట్రీమింగ్ సైట్ నుంచి తొలగించింది.
తక్కువ సమయంలో పేరు, ప్రఖ్యాతులను సంపాదించుకున్న మూసేవాలా.. ‘లైసెన్స్’ సాంగ్తో 2016 లో పంజాబీ సంగీత ప్రపంచంలోకి అడుగిడారు. పాటలతో తన కొడుకు ఇంకా బతికే ఉన్నాడని మూసేవాలా తండ్రి బల్కౌర్ సింగ్ వ్యాఖ్యానించారు. రానున్న రోజుల్లో ప్రతి ఆర్నెళ్లకోసారి ఆయన పాటలను విడుదల చేస్తామని చెప్పారు. కాగా, ఆయన హత్య మిస్టరీ ఇప్పటికీ వీడకపోవడం విశేషం.