MM Keeravani | సినిమా ఇండస్ట్రీలో ఎక్కువగా వినిపించే పదం ఒక్క ఛాన్స్. ఇండస్ట్రీలో తమ అదృష్టాన్ని పరీక్షించుకునేందుకు కొత్త డైరెక్టర్లు, యాక్టర్లు ఒకే ఒక్క ఛాన్స్ వస్తే చాలు అంటూ ఎదురుచూస్తుంటారని తెలిసిందే. ఆ ఒక్క ఛాన్సే వాళ్ల కెరీర్ను ముందుకు తీసుకెళ్లే తొలి అడుగుగా పడుతుంది. అలా ఒక్క ఛాన్స్ అందుకుని కెరీర్లో లెజెండరీ స్థాయికి ఎదిగినవాళ్లు చాలా మందే ఉన్నారు. అందులో ఒకరు ఎంఎం కీరవాణి (MM Keeravani). రీసెంట్గా ఎంఎం కీరవాణి ఆర్ఆర్ఆర్లో నాటు నాటు సాంగ్కు బెస్ట్ ఒరిజినల్ సాంగ్ విభాగంలో అత్యంత ప్రతిష్టాత్మక ఆస్కార్ పురస్కారం అందుకున్న విషయం తెలిసిందే. అయితే ఇది తనకు రెండో ఆస్కార్ అని, మొదటిది ఆస్కార్ వేరే ఉందని చెప్పుకొచ్చాడు.
ఇదే విషయంపై ఓ చిట్చాట్లో కీరవాణి మాట్లాడుతూ..’దాదాపు 51 మంది దర్శకులు, నిర్మాతలు, ఇతరులు నా డెమో క్యాసెట్ను తిరస్కరించారు. సగం మంది నా పనితీరు ఏంటో కూడా వినకుండా చెత్తబుట్టలో పడేసి ఉండొచ్చు. కానీ నా డెబ్యూ క్యాసెట్ విన్న రామ్ గోపాల్ వర్మ (Ram Gopal Varma)నాకు క్షణ క్షణం (Kshana Kshanam) సినిమాకు పనిచేసే అవకాశం ఇచ్చి.. మొదటి బ్రేక్ అందించారు. నేను టాలెంటెడ్ కంపోజర్నా..? కాదా..? అని తెలియదు. కానీ రాంగోపాల్ వర్మ నన్ను ఎంపిక చేసిన తర్వాత చాలా మంది నేను టాలెంటెడ్ అని భావించి నాతో సినిమాలకు సంతకం చేయించుకున్నారు. అందుకే వర్మే నా మొదటి ఆస్కార్ అంటూ చెప్పుకొచ్చాడు’ కీరవాణి.
మొత్తానికి కెరీర్లో తొలినాళ్లలోనే మంచి బ్రేక్ ఇచ్చిన వర్మను గుర్తు చేసుకుని.. ఎవరు అవునన్నా.. కాదన్నా వర్మ టాలెంటెడ్ డైరెక్టర్ అని మరోసారి చెప్పకనే చెప్పాడు కీరవాణి. ప్రస్తుతం ఈ లెజెండరీ మ్యూజిక్ డైరెక్టర్ హరిహరవీరమల్లు సినిమాకు సంగీతం అందిస్తున్నాడు.