సినీ ఇండ‌స్ట్రీ పెద్ద‌గా ఉండ‌ను.. పెద్ద‌రికంపై చిరంజీవి సంచ‌ల‌న వ్యాఖ్య‌లు

Chiranjeevi | ఇండస్ట్రీ పెద్ద అనిపించుకోవడం తనకు ఇబ్బందని, ఆ స్థానం తనకు వద్దని మెగాస్టార్‌ చిరంజీవి అన్నారు. పెద్దరికం అనే హోదా ససేమిరా ఇష్టం లేదని చెప్పారు.

హైదరాబాద్‌: ఇండస్ట్రీ పెద్ద అనిపించుకోవడం తనకు ఇబ్బందని, ఆ స్థానం తనకు వద్దని మెగాస్టార్‌ చిరంజీవి అన్నారు. పెద్దరికం అనే హోదా ససేమిరా ఇష్టం లేదని చెప్పారు. చిరంజీవి చారిటబుల్‌ ట్రస్ట్‌లో జరిగిన ఓ కార్యక్రమంలో ఆయన మాట్లాడారు. తాను పెద్దగా ఉండనని, కానీ బాధ్యత గల బిడ్డగా ఉంటానని స్పష్టం చేశారు. సినిమా పరిశ్రమకు సమస్య ఉన్నా, కార్మికులు సమస్యల్లో ఉన్నా ఆదుకోవడానికి తాను ఎప్పుడు సిద్ధంగా ఉంటానని వెల్లడించారు.

అవసరం వచ్చినప్పుడు నేనున్నానంటూ ముందుకొస్తానని చెప్పారు. అనవసరమైనవాటికి తగుదనమ్మా అంటూ ముందుకొచ్చే ప్రసక్తే లేదన్నారు. అవసరమైనప్పుడు నా భుజం కాయాలనుకున్నప్పుడు వస్తా, ఇద్దరు కొట్టుకుంటుంటే తగవు తీర్చమంటే తీర్చనన్నారు. పరిశ్రమ సమగ్ర అవసరాల కోసమైతే ముందుకొస్తానని తెలిపారు.