‘అందరూ కొత్తవాళ్లు కలిసి చేసిన ప్రయత్నమిది. తప్పకుండా ప్రేక్షకులు ఇష్టపడతారనే నమ్మకంతో ప్రమోట్ చేశాం. భారీ ఓపెనింగ్స్ వస్తున్నాయి. దాంతో ఈ తరహా సినిమాలు చేయడానికి మరింత ధైర్యం వచ్చింది’ అన్నారు నిర్మాత సూర్యదేవర నాగవంశీ. నార్నే నితిన్, రామ్ నితిన్, గౌరీ ప్రియారెడ్డి, అనంతిక సునీల్కుమార్, గోపిక ఉద్యాన్ ప్రధాన పాత్రల్లో నటించిన ‘మ్యాడ్’ చిత్రం శుక్రవారం ప్రేక్షకుల ముందుకొచ్చింది.
కల్యాణ్ శంకర్ దర్శకుడిగా పరిచయమైన ఈ చిత్రాన్ని హారిక సూర్యదేవర నిర్మించారు. శుక్రవారం సాయంత్రం హైదరాబాద్లో ఏర్పాటు చేసిన సక్సెస్మీట్లో నిర్మాత నాగవంశీ మాట్లాడుతూ ‘చిత్రానికి పాజిటివ్ టాక్ రావడంతో రాబోవు రోజుల్లో మరిన్ని కలెక్షన్స్ పెరుగుతాయని భావిస్తున్నాం. అన్ని కేంద్రాల్లో అద్భుతమైన ఆదరణ దక్కుతున్నది. ఈ సినిమా విషయంలో మా అంచనాలన్నీ నిజమయ్యాయి’ అన్నారు. తన తొలి చిత్రానికే ఈ స్థాయి స్పందన రావడం ఆనందంగా ఉందని దర్శకుడు కల్యాణ్ శంకర్ అన్నారు. సినిమా బాగా ఆడుతుందని ముందే ఊహించామని, ఆసాంతం చక్కటి వినోదంతో అన్ని వర్గాలను ఆకట్టుకుంటున్నదని హీరోలు నార్నే నితిన్, సంతోష్ శోభన్, రామ్ నితిన్ ఆనందం వ్యక్తం చేశారు.