Visit:
వివాహానంతరం సినిమాల్ని బాగా తగ్గించింది అగ్ర కథానాయిక కీర్తి సురేష్‌. ప్రస్తుతం ఆమె చేతిలో రెండు సినిమాలు మాత్రమే ఉన్నాయి. తాజాగా ఈ భామ ‘రివాల్వర్‌ రీటా’ చిత్రంతో ప్రేక్షకుల్ని పలకరించబోతున్నది. దాదాపు రెండేళ్ల క్రితం మొదలైన ఈ సినిమా ఎట్టకేలకు ప్రేక్షకుల ముందుకురాబోతున్నది.
వినాయక చవితి సందర్భంగా ఆగస్ట్‌ 27న ‘రివాల్వర్‌ రీటా’ సందడి చేయబోతున్నది. ఈ విషయాన్ని చిత్రబృందం అధికారికంగా ప్రకటించింది. జేకే చంద్రు దర్శకత్వం వహించిన ఈ చిత్రాన్ని కామెడీ, యాక్షన్‌ ఎంటర్‌టైనర్‌గా తెరకెక్కించారు. ఈ సందర్భంగా కొత్త స్టిల్‌ను విడుదల చేశారు. దీనిని కీర్తి సురేష్‌ తన సోషల్‌మీడియా ఖాతాల్లో పంచుకుంది.
ఇప్పటికే విడుదలైన ట్రైలర్‌లో కీర్తి సురేష్‌ చేసిన పోరాటాలు, పండించిన కామెడీ హైలైట్‌గా నిలిచాయి. తన కెరీర్‌లో ఇదొక వైవిధ్యమైన చిత్రమని, ఇందులో తొలిసారి యాక్షన్‌ ఎపిసోడ్స్‌ చేశానని కీర్తి సురేష్‌ చెప్పింది. ప్రస్తుతం కీర్తి సురేష్‌ తమిళంలో ‘కన్నివీడి’ చిత్రంలో నటిస్తున్నది.
