Katrina Kaif | రీలవ్‌ ట్రెండ్‌లో పడిపోయిన బాలీవుడ్‌ బ్యూటీ కత్రినా కైఫ్‌

ఇప్పుడంతా రీ-లవ్‌ ట్రెండే! మళ్లీ మళ్లీ ప్రేమించడం ఏంటని కంగారొద్దు! ఈ రీ-లవ్‌ సంస్కృతి ఫ్యాషన్‌ ప్రపంచంలో చక్కర్లు కొడుతున్నది.

Katrina Kaif | ఇప్పుడంతా రీ-లవ్‌ ట్రెండే! మళ్లీ మళ్లీ ప్రేమించడం ఏంటని కంగారొద్దు! ఈ రీ-లవ్‌ సంస్కృతి ఫ్యాషన్‌ ప్రపంచంలో చక్కర్లు కొడుతున్నది. ఉపయోగించిన దుస్తులను తిరిగి అమ్మడం, కొనడాన్ని రీ-లవ్‌గా సూత్రీకరించారు ఫ్యాషన్‌ ప్రియులు. బాలీవుడ్‌ నటి కత్రినాకైఫ్‌ కూడా రీ-లవ్‌లో పడిపోయింది. దుస్తులు, యాక్సెసరీల సంస్థ సరిటోరియాతో కలిసి వినూత్న విధానానికి తన మద్దతు తెలిపింది. ఈ సందర్భంగా కత్రినా నయా ట్రెండ్‌ గురించి చెప్పిన ముచ్చట్లు ఇవి..

• ఏదైనా షాపింగ్‌కు వెళ్లినప్పుడు మనసుకు నచ్చిన దుస్తులే కొంటాం. కానీ, అవి వేసుకునే సందర్భమే రాకపోవచ్చు. అలాంటి దుస్తులు నా వార్డ్‌రోబ్‌లో చాలా ఉన్నాయి. వాటన్నిటినీ ఏం చేయాలో పాలుపోదు. అలాగని పడేయలేం. ‘రీ-లవ్‌’ కాన్సెప్ట్‌ నాకు నచ్చింది. దీని ద్వారా, మనం ఉపయోగించని దుస్తులను వేరేవారికి ఇచ్చే అవకాశం ఉంటుంది.
• పర్యావరణాన్ని కలుషితం చేస్తున్న పరిశ్రమల్లో ఫ్యాషన్‌ మూడో స్థానంలో ఉందని తెలిసి ఆశ్చర్యం వేసింది. ఒక వస్తువు నిరుపయోగంగా పడి ఉండటమూ పర్యావరణానికి హానికరమే కదా! అనిపించింది. కొత్త ట్రెండ్స్‌పేరుతో పరుగులు తీస్తున్న ఫ్యాషన్‌ ప్రపంచం ఆలోచించుకోవాల్సిన తరుణం ఇది. ‘రీ-లవ్‌’ వల్ల ఇప్పటికిప్పుడే మార్పు రాకపోయినా.. దీర్ఘకాలంలో కొన్ని ప్రయోజనాలు కలుగుతాయి. దుస్తుల ఉత్పత్తి విధానాల్లో మార్పులకు ఇది నాంది పలుకుతుందని నమ్ముతున్నా.
• ఫ్యాషన్‌ ట్రెండ్స్‌ను రెగ్యులర్‌గా ఫాలో అవుతుంటాను. సినిమా ఇండస్ట్రీలోకి వచ్చాక మరింత ఎక్కువైంది! ఏది ఎంచుకున్నా నా శరీరానికి నప్పేలా చూసుకుంటాను. అలాగే కాలానికి తగ్గట్టు కనిపించాలనుకుంటాను.