Visit:
‘ ‘క’ సినిమాకు మేం ఎంత ప్రమోషన్‌ చేశామో, ఈటీవీ విన్‌ వాళ్లు అంత ప్రమోషన్‌ చేసి, పైరసీ అనేది జరగకుండా జాగ్రత్తగా సినిమాను ప్రతి ఒక్కరి ఇంటికి చేర్చారు. డాల్బీ విజన్‌ 4కే, అట్మాస్‌ టెక్నాలజీ నుంచి ఓటీటీకి వచ్చిన తొలి తెలుగు సినిమా ‘క’నే కావడం విశేషం. అందుకు ఈటీవీ విన్‌ టీమ్‌కి థాంక్స్‌ చెప్పుకుంటున్నా.
థియేటర్లో చూసిన వాళ్లు కూడా మరోసారి ఇంట్లో ‘క’ చూడండి. ఎందుకంటే సెకండ్‌ టైమ్‌ ఇంకా బాగా అనిపించిందని చూసిన వాళ్లు చెబుతున్నారు’ అని హీరో కిరణ్‌ అబ్బవరం అన్నారు. ఆయన హీరోగా, దర్శక ద్వయం సుజీత్‌. సందీప్‌ దర్శకత్వంలో చింతా గోపాలకృష్ణారెడ్డి నిర్మించిన ‘క’ చిత్రం ఇటీవల విడుదలై మంచి విజయాన్ని సాధించిన విషయం తెలిసిందే.
అలాగే విడుదలైన అన్ని భాషల్లో సినిమా మంచి వసూళ్లు రాబట్టిందని మేకర్స్‌ ఆనందం వెలిబుచ్చారు. ఈ సందర్భంగా శనివారం హైదరాబాద్‌లో నిర్వహించిన ‘క’ బ్లాక్‌బస్టర్‌ ధమాకా ఈవెంట్‌లో కిరణ్‌ అబ్బవరం మాట్లాడారు. ఓటీటీలో కూడా ‘క’కు మంచి ఆదరణ లభిస్తుండటం పట్ల దర్శకులు సుజీత్‌, సందీప్‌ ఆనందం వెలిబుచ్చారు.
