తమిళనాట అగ్ర కథానాయకుల్లో అజిత్ ఒకరు. ఆయన తాజా చిత్రం ‘తెగింపు’ తమిళనాట భారీ విజయాన్ని దక్కించుకుంది. అయితే అజిత్ తదుపరి చిత్రంపై ఇంకా ఎటువంటి ప్రకటన రాలేదు. తాజా సమాచారం ప్రకారం దర్శకుడు శివతో అజిత్ ఓ చిత్రానికి గ్రీన్సిగ్నల్ ఇచ్చారని తెలుస్తున్నది. గతంలో వీరిద్దరు కలిసి వీరమ్, విశ్వాసం, వివేకం వంటి హిట్ చిత్రాలను అందించారు.
ఈ నేపథ్యంలో తనకు బాగా కలిసొచ్చిన శివ దర్శకత్వంలోనే అజిత్ తదుపరి చిత్రానికి సన్నాహాలు చేస్తున్నారని తమిళ చిత్రసీమలో వినిపిస్తున్నది. ప్రస్తుతం సూర్య కథానాయకుడిగా దర్శకుడు శివ ‘కంగువ’ అనే పాన్ ఇండియా చిత్రాన్ని తెరకెక్కిస్తున్నాడు. ఈ సినిమా పూర్తయిన వెంటనే ఆయన అజిత్ సినిమాకు దర్శకత్వం వహిస్తారని సమాచారం.