అతిథి పాత్రేనా?

హీరో రజినీకాంత్‌ ఇటీవలే తన కొత్త సినిమా ‘జైలర్‌’కు శ్రీకారం చుట్టారు. లాంఛనంగా ప్రారంభమైన రోజు నుంచే రెగ్యులర్‌ చిత్రీకరణ కూడా మొదలుపెట్టారు. ఈ సినిమాలో తమన్నా నటిస్తుందని చిత్రబృందం ప్రకటించగానే ఆమె చేస్తున్నది నాయిక పాత్రే అనుకున్నారు. కానీ తాజా వివరాల ప్రకారం తమన్నా ఈ చిత్రంలో స్వల్ప నిడివి గల క్యారెక్టర్‌లో కనిపించనుందట. ఒకరకంగా అతిథి పాత్ర అనుకోవచ్చు. రజినీకాంత్‌ సరసన తమన్నాను చూద్దామనుకున్న వాళ్లకు ఇది నిరాశను కలిగిస్తున్నది.

ఆమె పాత్ర కాసేపే ఉన్నా కథలో కీలకంగా ఉంటుందని..అందుకే తమన్నాను ఎంచుకున్నామని టీమ్‌ చెబుతోంది. చెన్నైలో వేసిన ప్రత్యేక సెట్‌లో ఈ సినిమా చిత్రీకరణ జరుగుతున్నది. ఆ తర్వాతి షెడ్యూల్‌ హైదరాబాద్‌లో జరిపేందుకు సన్నాహాలు చేస్తున్నారు. ఇటీవలే ‘ఎఫ్‌3’లో మెరిసిన తమన్నా ప్రస్తుతం తెలుగులో చిరంజీవి సరసన ‘భోళా శంకర్‌’, హిందీలో ‘భోలే చుడియాన్‌’, ‘ప్లాన్‌ ఏ ప్లాన్‌ బీ’, ‘బబ్లీ బౌన్సర్‌’ చిత్రాల్లో నటిస్తున్నది.