Hari Hara Veera Mallu | బుర్జ్ ఖలీఫాపై ‘హరిహర వీరమల్లు’ ట్రైలర్ ప్లాన్

Hari Hara Veera Mallu Trailer in | పవర్ స్టార్ పవన్ కళ్యాణ్, దర్శకుడు జ్యోతికృష్ణ కాంబినేషన్‌లో రూపొందుతున్న భారీ బడ్జెట్ చిత్రం 'హరిహర వీరమల్లు' ప్రమోషన్ కార్యక్రమాలు ప్రారంభం కానున్నాయి.

Hari Hara Veera Mallu Trailer in | పవర్ స్టార్ పవన్ కళ్యాణ్, దర్శకుడు జ్యోతికృష్ణ కాంబినేషన్‌లో రూపొందుతున్న భారీ బడ్జెట్ చిత్రం ‘హరిహర వీరమల్లు’ ప్రమోషన్ కార్యక్రమాలు ప్రారంభం కానున్నాయి. ఈ పీరియాడిక్ యాక్షన్ అడ్వెంచర్ చిత్రం రెండు భాగాలుగా తెరకెక్కుతున్న విషయం తెలిసిందే. ఇటీవల మేకర్స్ మొదటి భాగం ‘హరిహర వీరమల్లు పార్ట్-1: స్వార్డ్ వర్సెస్ స్పిరిట్’ విడుదల తేదీని జూన్ 12గా అధికారికంగా ప్రకటించారు.

తాజాగా ఈ సినిమాకు సంబంధించి ఒక ఆసక్తికరమైన వార్త సోషల్ మీడియాలో చక్కర్లు కొడుతోంది. చిత్ర బృందం సినిమాను గ్లోబల్ స్థాయిలో ప్రమోట్ చేయాలని యోచిస్తోంది. ఇందులో భాగంగానే ట్రైలర్‌ను వినూత్నంగా విడుదల చేసేందుకు ప్లాన్ చేస్తున్నారు. విశ్వసనీయ వర్గాల సమాచారం ప్రకారం, దుబాయ్‌లోని ప్రపంచ ప్రఖ్యాత బుర్జ్ ఖలీఫా భవనంపై ‘హరిహర వీరమల్లు’ ట్రైలర్‌ను విడుదల చేసే ఆలోచనలో మేకర్స్ ఉన్నారు. ప్రపంచంలోనే అత్యంత ఎత్తైన భవనంపై తెలుగు సినిమా ట్రైలర్ విడుదల కావడం ఇదే తొలిసారి కానుంది.

ఇంతకుముందు బాలీవుడ్ నటుడు షారుక్ ఖాన్ నటించిన ‘జవాన్’ సినిమా ట్రైలర్‌ను బుర్జ్ ఖలీఫాపై విడుదల చేశారు. ఒకవేళ ‘హరిహర వీరమల్లు’ ట్రైలర్ బుర్జ్ ఖలీఫాపై విడుదలయితే, ఈ ఘనత సాధించిన మొట్టమొదటి తెలుగు సినిమాగా ఇది రికార్డు సృష్టిస్తుంది.

కాగా, ఈ చిత్రంలో నిధి అగర్వాల్ కీలక పాత్ర పోషిస్తోంది. బాలీవుడ్ నటులు అనుపమ్ ఖేర్, బాబీ డియోల్, నోరా ఫతేహి, విక్రమ్ జీత్, జిషుసేన్ గుప్తా తదితరులు ముఖ్యమైన పాత్రల్లో నటిస్తున్నారు. హాలీవుడ్ స్టంట్ డైరెక్టర్ నిక్ పాల్ ఆధ్వర్యంలో భారీ యాక్షన్ సన్నివేశాలను చిత్రీకరించారు. ఆస్కార్ విజేత ఎం.ఎం. కీరవాణి ఈ చిత్రానికి సంగీతం అందిస్తున్నారు. మెగా సూర్య ప్రొడక్షన్స్ బ్యానర్‌పై ఏ.ఎం. రత్నం సమర్పణలో ఎ. దయాకర్ రావు ఈ చిత్రాన్ని నిర్మిస్తున్నారు. త్వరలోనే ఈ విషయంపై అధికారిక ప్రకటన వెలువడే అవకాశం ఉంది.