Fathers day | ఫాదర్స్ డే స్పెషల్.. టాలీవుడ్‌లో నాన్న సెంటిమెంట్‌తో వచ్చిన ఎవర్‌గ్రీన్ సినిమాలు ఇవే!

Father Sentiment | నాన్నంటే ఒక నమ్మకం, ఒక ధైర్యం, కుటుంబానికి కొండంత అండ. అమ్మ మనల్ని నవమాసాలు కడుపులో మోస్తే.. నాన్న జీవితాంతం తన గుండెల్లో పెట్టుకుని చూసుకుంటాడు.

Father Sentiment | నాన్నంటే ఒక నమ్మకం, ఒక ధైర్యం, కుటుంబానికి కొండంత అండ. అమ్మ మనల్ని నవమాసాలు కడుపులో మోస్తే.. నాన్న జీవితాంతం తన గుండెల్లో పెట్టుకుని చూసుకుంటాడు. అయితే వెండితెరపై కూడా నాన్న ప్రేమను, త్యాగాలను ఆవిష్కరించిన సినిమాలు టాలీవుడ్‌లో ఎన్నో వచ్చాయి. ఈ ఫాదర్స్ డే సందర్భంగా తెలుగు ప్రేక్షకుల గుండెల్లో నిలిచిపోయిన కొన్ని అద్భుతమైన ‘నాన్న’ సినిమాలపై ఓ లుక్కేద్దాం.

1. బొమ్మరిల్లు (Bommarillu)
తెలుగులో ఫాదర్ సెంటిమెంట్ అనగానే అందరికీ గుర్తొచ్చే మొదటి సినిమా ‘బొమ్మరిల్లు’. కొడుకు బాగుండాలని ప్రతి విషయాన్ని తనే దగ్గరుండి చూసుకునే తండ్రిగా ప్రకాష్ రాజ్, తండ్రి మితిమీరిన ప్రేమ వల్ల తన వ్యక్తిత్వాన్ని కోల్పోతున్నానని ఆవేదన చెందే కొడుకుగా సిద్ధార్థ్ నటన అద్భుతం. ఇప్పటికీ సమాజంలో అతిగా కేర్ తీసుకునే తండ్రులను ‘బొమ్మరిల్లు ఫాదర్’ అని పిలుస్తుంటారంటే ఈ సినిమా ఇంపాక్ట్ ఎలాంటిదో అర్థం చేసుకోవచ్చు.

2. నాన్నకు ప్రేమతో (Nannaku Prematho)
ఎన్టీఆర్ హీరోగా సుకుమార్ దర్శకత్వంలో వచ్చిన ఈ చిత్రం తండ్రిపై కొడుకుకు ఉండే అమితమైన ప్రేమను చూపిస్తుంది. అంపశయ్యపై ఉన్న తన తండ్రి (రాజేంద్ర ప్రసాద్) ని మోసం చేసిన విలన్‌పై రివెంజ్ తీర్చుకుని, తండ్రి కోల్పోయిన గౌరవాన్ని, ఆఖరి కోరికను కొడుకు ఎలా నెరవేర్చాడనేది ఈ సినిమా కథ. తండ్రికి కొడుకు ఇచ్చే నిజమైన బహుమతి ఏంటో ఈ చిత్రం చాటిచెప్పింది.

3. సన్ ఆఫ్ సత్యమూర్తి (S/O Satyamurthy)
నాన్న బతికున్నప్పుడు ఆయన ఇచ్చిన ఆస్తుల కంటే.. ఆయన సంపాదించిన ‘విలువలు’, ‘నమ్మకమే’ ముఖ్యం అని నమ్మే కొడుకు కథ ఇది. అల్లు అర్జున్ హీరోగా, ప్రకాష్ రాజ్ తండ్రి పాత్రలో నటించిన ఈ చిత్రంలో తండ్రి బ్రాండ్‌కు ఎక్కడా మచ్చ పడకూడదని కొడుకు పడే తపన, కోట్ల ఆస్తిని కూడా వదులుకునే మనస్తత్వం ప్రేక్షకులను ఎంతగానో ఆకట్టుకున్నాయి.

4. ఆడువారి మాటలకు అర్థాలే వేరులే (AMAV)
ఇది చూసేందుకు లవ్ స్టోరీలా అనిపించినా.. ఇందులో తండ్రీకొడుకుల (కోట శ్రీనివాసరావు – వెంకటేష్) మధ్య వచ్చే ఎమోషనల్ సీన్స్ సినిమాకే హైలైట్. ఖాళీగా తిరుగుతున్న కొడుకును తండ్రి తిట్టడం వెనుక ఉన్న బాధను, కొడుకు ఉద్యోగం సాధించాక ఆ తండ్రి పడే ఆనందాన్ని చాలా సహజంగా చూపించారు. క్లైమాక్స్ సీన్స్ చూసి కన్నీళ్లు పెట్టుకోని ప్రేక్షకుడు ఉండడు.

5. జెర్సీ (Jersey)
నాని కెరీర్‌లోనే వన్ ఆఫ్ ది బెస్ట్ మూవీగా నిలిచిన ‘జెర్సీ’.. కొడుకు కళ్లల్లో తను ఒక ‘లూజర్’ లా మిగిలిపోకూడదు, ఒక ‘హీరో’గా నిలబడాలి అని తపించే ఓ తండ్రి కథ. 36 ఏళ్ల వయసులో కొడుకు అడిగిన ఇండియన్ జెర్సీ కొనివ్వడం కోసం ప్రాణాలను సైతం లెక్కచేయకుండా క్రికెట్ గ్రౌండ్‌లోకి దిగిన తండ్రి పాత్ర ప్రతి ఒక్కరి గుండెలను పిండేస్తుంది.

6. డాడీ (Daddy)
మెగాస్టార్ చిరంజీవి నటించిన ఈ చిత్రం తండ్రీకూతుళ్ల అనుబంధానికి అద్దం పడుతుంది. తన కూతురి ప్రాణాలు కాపాడుకోవడం కోసం ఒక తండ్రి పడే వేదన, పరితపించే మనస్తత్వాన్ని చిరంజీవి తన నటనతో అద్భుతంగా పండించారు.

7. కొత్త బంగారు లోకం (Kotha Bangaru Lokam)
దిల్ రాజు బ్యానర్‌లో వచ్చిన ‘కొత్త బంగారు లోకం’ యుక్తవయసు కొడుకు, తండ్రి మధ్య ఉండే అనుబంధాన్ని ఎంతో సహజంగా చూపించింది. కొడుకుకు అడుగడుగునా అండగా నిలిచే తండ్రి, ఆయన మరణం తర్వాతే తండ్రి విలువ తెలుసుకుని జీవితంలో స్థిరపడే కొడుకు కథ ఇది. శ్రీకాంత్ అడ్డాల దర్శకత్వంలో వరుణ్ సందేశ్ హీరోగా నటించగా, ప్రకాష్ రాజ్ తండ్రి పాత్రలో జీవించారు. వీరిద్దరి మధ్య వచ్చే ఎమోషనల్ సీన్స్ ఇప్పటికీ ప్రేక్షకులను కంటతడి పెట్టిస్తాయి. యూత్‌కు తండ్రి ప్రేమ విలువ తెలిపిన సినిమాగా ఇది నిలిచిపోయింది.

8.మనం (Manam)
అక్కినేని మూడు తరాల నటులు కలిసి నటించిన ‘మనం’ చిత్రంలో తండ్రి-కొడుకుల బంధాన్ని ఓ కొత్త కోణంలో చూపించారు. గత జన్మలో విడిపోయిన తల్లిదండ్రులను ఈ జన్మలో కలపాలని తపనపడే కొడుకు, అనుకోని ప్రమాదంలో మరణించిన అమ్మానాన్నలు మళ్లీ జన్మలో సంతోషంగా బతకాలని ఆరాటపడే వృద్ధుడైన కొడుకు కథ ఇది. విక్రమ్ కె కుమార్ దర్శకత్వం వహించిన ఈ కల్ట్ క్లాసిక్‌లో అక్కినేని నాగేశ్వరరావు, నాగార్జున, నాగచైతన్య, శ్రియా, సమంత కీలక పాత్రలు పోషించారు. తరాలకు అతీతమైన తండ్రి ప్రేమను చాటిన చిత్రమిది.

9.సుస్వాగతం (Suswaagatham)
పవర్ స్టార్ పవన్ కళ్యాణ్ హీరోగా భీమినేని శ్రీనివాస్ తెరకెక్కించిన ‘సుస్వాగతం’ కూడా తండ్రీ కొడుకుల అనుబంధానికి అద్దం పట్టింది. కొడుకుకి ప్రతి విషయంలోనూ తోడుగా నిలిచే తండ్రి, అవసరమైతే ప్రేమ విషయంలోనూ స్నేహితుడిలా భావోద్వేగ మద్దతు ఇస్తాడనే కథాంశంతో సినిమా సాగుతుంది. ఇందులో రఘువరన్, పవన్ కళ్యాణ్ తమ నటనతో ప్రాణం పోశారు. తండ్రి మరణం తర్వాత వచ్చే ‘ఆలయాన హారతిలో’ పాట ఇప్పటికీ ఎవర్‌గ్రీన్‌గా నిలిచిపోయి, విన్న ప్రతిసారీ కన్నీళ్లు తెప్పిస్తుంది.

ఇక ఈ సినిమాలు మాత్రమే కాదు చాలా సినిమాలు తెలుగులో తండ్రి ప్రేమ‌ను చాలా అందంగా చూపించాయి. మన నిజ జీవితంలోనూ నాన్నే మన మొదటి సూపర్ హీరో. ఈ ఫాదర్స్ డే రోజున మీ నాన్నతో కాసేపు సమయాన్ని గడిపి, ఆయనపై మీకున్న ప్రేమను పంచుకోండి. హ్యాపీ ఫాదర్స్ డే!