Visit:
Fauji | పాన్ ఇండియా స్టార్ ప్రభాస్ హీరోగా తెరకెక్కుతున్న భారీ ప్రాజెక్ట్ ‘ఫౌజీ’. ఈ చిత్రంపై భారీ అంచనాలు ఉన్నాయి. అయితే ఈ మూవీ షూటింగ్ కి వెళుతున్న వాహనానికి ప్రమాదం జరగడంతో విషాదం చోటు చేసుకుంది. సినిమా షూటింగ్లో భాగంగా ప్రొడక్షన్ యూనిట్ సభ్యులు ప్రయాణిస్తున్న వాహనం ప్రమాదానికి గురవడంతో ఒకరు ప్రాణాలు కోల్పోగా, మరో ఐదుగురు తీవ్రంగా గాయపడ్డారు. ఈ ప్రమాదం హైదరాబాద్ సమీపంలోని అబ్దుల్లాపూర్మెట్ ప్రాంతంలో జరిగినట్లు సమాచారం. యూనిట్ సభ్యులు షూటింగ్ కోసం బయలుదేరగా, ఆ కారు అదుపు తప్పి ప్రమాదానికి గురైనట్లు తెలుస్తోంది.
ఈ ఘటనలో గాయపడిన వారిని వెంటనే సమీపంలోని ప్రైవేట్ ఆసుపత్రికి తరలించి చికిత్స అందిస్తున్నారు. వారి ఆరోగ్య పరిస్థితిపై ఇంకా పూర్తి వివరాలు తెలియాల్సి ఉంది. ఈ ప్రమాదంతో ‘ఫౌజీ’ చిత్ర యూనిట్లో తీవ్ర ఆందోళన నెలకొంది. చిత్రబృందం సభ్యులు గాయపడిన వారి ఆరోగ్యంపై ఆరా తీస్తూ, అవసరమైన సహాయం అందించేందుకు ముందుకొస్తున్నారు. ప్రమాదంలో ఒకరి మృతి చెందడం సినిమా యూనిట్ను దిగ్భ్రాంతికి గురి చేసింది. ఇక ఈ చిత్రాన్ని ‘సీతారామం’తో గుర్తింపు పొందిన దర్శకుడు హను రాఘవపూడి రూపొందిస్తున్నారు. ప్రేమ, దేశభక్తి, యాక్షన్ మేళవింపుతో రూపొందుతున్న ఈ సినిమా ఇప్పటికే భారీ అంచనాలను సొంతం చేసుకుంది.
ఈ చిత్రంలో ప్రభాస్ సరసన హీరోయిన్గా ఇమాన్ ఈశ్వర్ నటిస్తుండగా, ప్రముఖ నటి జయప్రద, బాలీవుడ్ సీనియర్ నటుడు అనుపమ్ ఖేర్, లెజెండరీ నటుడు మిథున్ చక్రవర్తి కీలక పాత్రలు పోషిస్తున్నారు. టి-సిరీస్ బ్యానర్పై గుల్షన్ కుమార్ సమర్పణలో, భూషణ్ కుమార్ ఆధ్వర్యంలో, మైత్రీ మూవీ మేకర్స్ నిర్మాణంలో నవీన్ ఎర్నేని, వై. రవిశంకర్ ఈ చిత్రాన్ని నిర్మిస్తున్నారు. ప్రస్తుతం ఈ ప్రమాదంతో షూటింగ్ షెడ్యూల్పై ప్రభావం పడే అవకాశముంది. ఇక ఈ భారీ చిత్రాన్ని ఈ ఏడాది దసరా సందర్భంగా విడుదల చేయాలని మేకర్స్ ప్లాన్ చేస్తున్నారు. కానీ తాజా ఘటన నేపథ్యంలో విడుదల తేదీపై మార్పులు ఉంటాయా లేదా అన్నది చూడాల్సి ఉంది.
