DJ Tillu | టాక్ ఆఫ్ ది ఇండస్ట్రీగా మారిపోయిన డీజే టిల్లు.. సిద్ధూ ఏం చేస్తాడో?

February 7, 2022 / 09:35 PM IST

DJ Tillu | సాధారణంగా ఒక్క సినిమా హిట్ అయితే చాలు.. ఆయన నటించిన తర్వాత సినిమాపై కూడా అంచనాలు అలాగే ఉంటాయి. ఎందుకంటే ఇండస్ట్రీ నడిచేది హిట్ అనే ఇంధనంపై కాబట్టి. ఇక్కడ హిట్స్ ఎవరెక్కువ ఇస్తే.. వాళ్ల బండి అంత వేగంగా నడుస్తుందని అర్థం. వాళ్లను అందుకోడానికి రేసు నడుస్తూనే ఉంటుంది. ఈ రేసులో అప్పుడప్పుడూ కొత్త హీరోలు కూడా తామున్నామని గుర్తు చేస్తుంటారు. ఎలాంటి బ్యాక్‌గ్రౌండ్ లేకుండా సొంతంగా తమ టాలెంట్ నమ్ముకుని వస్తుంటారు కొందరు కుర్రాళ్లు. అలా వచ్చిన హీరో సిద్ధూ జొన్నలగడ్డ. ఇప్పటికే కారెక్టర్ ఆర్టిస్టుగా, విలన్‌గా చాలా సినిమాలు చేశాడు సిద్ధూ. ఈయనెవరో ఇంకా గుర్తు రాలేదంటే ఒక్కసారి గుంటూరు టాకీస్ సినిమాలో రష్మి గౌతమ్‌తో రొమాన్స్ చేసిన కుర్రాడ్ని గుర్తు చేసుకోండి.. సరిపోతుంది. ఆయనే ఈ సిద్ధూ.

గుంటూరు టాకీస్ తర్వాత కల్కి సినిమాలోనూ మంచి పాత్రే చేశాడు సిద్ధూ జొన్నలగడ్డ. కృష్ణ అండ్ హిస్ లీల సినిమాతో రైటర్‌గానూ మారి విజయాన్ని అందుకున్నాడు. ఈ చిత్రం ఆహా వేదికగా నేరుగా విడుదలైంది. కరోనా టైమ్‌లో వచ్చిన ఈ సినిమాకు మంచి అప్లాజ్ వచ్చింది. అయితే ఆ వెంటనే చేసిన మా వింత గాథ‌ వినుమా మాత్రం అంతగా ఆకట్టుకోలేదు. ఇప్పుడు ఈయనే రైటర్‌గా మారి చేసిన సినిమా డీజే టిల్లు. సితార ఎంటర్‌టైన్మెంట్స్ బ్యానర్ నుంచి వస్తున్న సినిమా కావడంతో అంచనాలు బాగానే ఉన్నాయి. పైగా డిజే టిల్లు టైటిల్ సాంగ్ ఇప్పుడు మార్మోగిపోతుంది. రామ్ మరియాల పాడిన పాటకు రెస్పాన్స్ అదిరిపోయింది. నేహా శెట్టి అందాలు.. సిద్ధూ తెలంగాణ యాసలో చెప్పిన డైలాగులు అన్ని సినిమాపై ఆసక్తి పెంచేస్తున్నాయి. ప్రస్తుతం ట్రైలర్ కూడా యూ ట్యూబ్‌లో అదరగొడుతుంది.

ఫిబ్రవరి 12న డీజే టిల్లు విడుదల కానుంది. పైగా విడుదలకు ముందే ఈ చిత్రాన్ని ఔట్ రేటెడ్‌గా అమ్మేశారు. టేబుల్ ప్రాఫిట్స్‌తోనే డీజే టిల్లు అమ్ముడైంది. కచ్చితంగా సినిమా నవ్వించి నవ్వించి చంపేస్తుందంటున్నాడు సిద్ధూ. ఫిబ్రవరి 11న రవితేజ ఖిలాడి వస్తున్నా కూడా వెనక్కి తగ్గేదే లేదంటున్నాడు ఈయన. టాక్ ఆఫ్ ది ఇండస్ట్రీగా మారిన డీజే టిల్లు థియేటర్స్‌లో కూడా అదే స్థాయిలో మోత మోగిస్తాడో లేదో చూడాలి.

Follow us on Google News, Facebook, Twitter , Instagram, Youtube