Jailer 2 | రజనీకాంత్ అభిమానులకు గుడ్ న్యూస్ ..తెలంగాణలో సాధారణ టికెట్ ధరలకే ‘జైలర్ 2’..

Jailer 2 | సూపర్‌స్టార్ రజనీకాంత్ నటించిన ‘జైలర్ 2’ సినిమా విడుదలకు ముందే టికెట్ ధరల అంశం చర్చనీయాంశంగా మారింది. ఆంధ్రప్రదేశ్ ప్రభుత్వం ఈ సినిమాకు టికెట్ ధరలు పెంచుకునేందుకు అనుమతి ఇవ్వడంతో అభిమానులు, సినీ ప్రేక్షకుల్లో చర్చ మొదలైంది.

Jailer 2 | సూపర్‌స్టార్ రజనీకాంత్ నటించిన ‘జైలర్ 2’ సినిమా విడుదలకు ముందే టికెట్ ధరల అంశం చర్చనీయాంశంగా మారింది. ఆంధ్రప్రదేశ్ ప్రభుత్వం ఈ సినిమాకు టికెట్ ధరలు పెంచుకునేందుకు అనుమతి ఇవ్వడంతో అభిమానులు, సినీ ప్రేక్షకుల్లో చర్చ మొదలైంది. అయితే తెలంగాణలో మాత్రం ఈ సినిమా టికెట్ ధరలను సాధారణ స్థాయిలోనే కొనసాగించాలని నైజాం పంపిణీదారులు నిర్ణయించినట్లు స‌మాచారం. ఇదే నిజమైతే తెలంగాణలో సినిమా చూసే ప్రేక్షకులకు కొంత ఊరట లభించనుంది.

రజనీకాంత్, నెల్సన్ దిలీప్‌కుమార్ కలయికలో రూపొందుతున్న ‘జైలర్ 2’ అక్టోబర్ 15న ప్రేక్షకుల ముందుకు రానుంది. ఈ నేపథ్యంలో ఆంధ్రప్రదేశ్ ప్రభుత్వం సినిమా విడుదలైన తొలి ఏడు రోజుల పాటు టికెట్ ధరల పెంపునకు అనుమతి ఇచ్చింది. అక్టోబర్ 15 నుంచి 21 వరకు సింగిల్ స్క్రీన్ థియేటర్లలో ఒక్కో టికెట్‌పై రూ.50, మల్టీప్లెక్స్‌లలో రూ.75 అదనంగా వసూలు చేసుకునేందుకు అవకాశం కల్పించింది. అలాగే రోజుకు ఐదు ఆటలు ప్రదర్శించుకునేందుకు అనుమతి ఇచ్చినట్లు వార్తలు వచ్చాయి. డబ్బింగ్ సినిమాకు కూడా టికెట్ ధరలు పెంచుకునేందుకు అనుమతి ఇవ్వడంపై కొందరు నెటిజన్లు ప్రశ్నలు లేవనెత్తుతున్నారు. భారీ అంచనాలున్న సినిమాల కోసం ప్రేక్షకులు అదనపు ధరలు చెల్లించాల్సి రావడం సరైనదేనా? అనే చర్చ సామాజిక మాధ్యమాల్లో కనిపిస్తోంది.

మరోవైపు తెలంగాణలో ‘జైలర్ 2’ టికెట్ ధరల విషయంలో స‌రికొత్త‌ నిర్ణయం తీసుకున్నట్లు సమాచారం. నైజాం పంపిణీదారులు సాధారణ టికెట్ ధరలనే కొనసాగించాలని నిర్ణయించినట్లు ప్రచారం జరుగుతోంది. ఈ సమాచారం ప్రకారం సింగిల్ స్క్రీన్ థియేటర్లలో టికెట్ ధర రూ.175గా, మల్టీప్లెక్స్‌లలో రూ.295గా ఉండనుంది.అయితే తెలంగాణలో ఈ ధరలకు సంబంధించి అధికారిక ప్రకటన రావ‌ల‌సి ఉంది. సాధారణ ధరలే అమల్లో ఉంటే కుటుంబంతో కలిసి సినిమా చూడాలనుకునే ప్రేక్షకులకు, ముఖ్యంగా మల్టీప్లెక్స్‌లకు వెళ్లేవారికి కొంత ఉపశమనం లభించే అవకాశం ఉంది.ఒకవైపు ఏపీలో టికెట్ ధరల పెంపు, మరోవైపు తెలంగాణలో సాధారణ ధరలకే సినిమా అందుబాటులో ఉంటుందన్న సమాచారం ఇప్పుడు చ‌ర్చ‌నీయాంశంగా మారింది. పండుగ సమయంలో విడుదలవుతున్న పెద్ద సినిమాలకు టికెట్ ధరలు కీలక అంశంగా మారుతున్నాయి.