హీరో కళ్యాణ్ రామ్ నటిస్తున్న సోషియో ఫాంటసీ సినిమా ‘బింబిసార’. సంయుక్తా మీనన్, క్యాథరీన్ ట్రెసా నాయికలు. దర్శకుడు వశిష్ఠ్ ఈ చిత్రాన్ని రూపొందించారు. ఎన్టీఆర్ ఆర్ట్స్ బ్యానర్పై హరికృష్ణ.కె నిర్మిస్తున్నారు. ఆగస్టు 5న ఈ సినిమా ప్రేక్షకుల ముందుకురానుంది. తాజాగా ఈ సినిమా ట్రైలర్ విడుదల కార్యక్రమాన్ని హైదరాబాద్లో నిర్వహించారు. ఈ కార్యక్రమంలో హీరోయిన్ సంయుక్తా మీనన్ మాట్లాడుతూ…‘కళకు విలువ ఇచ్చే ఇండస్ట్రీ టాలీవుడ్. నేను తెలుగులో నటించిన మొదటి చిత్రమిది. రెండు రోజుల షూటింగ్ తర్వాత ఈ చిత్రంలో నటిస్తున్నందుకు థ్యాంక్స్ అంటూ కళ్యాణ్ రామ్ దగ్గర నుంచి మెసేజ్ వచ్చింది. ఆర్టిస్టులంటే ఈ టీమ్కు ఎంత గౌరవం ఉందో అప్పుడే తెలిసింది. ట్రైలర్లాగే సినిమా కూడా మీకు బాగా నచ్చుతుంది’ అని చెప్పింది. “రుద్రమదేవి’ తర్వాత నేను నటిస్తున్న పీరియాడిక్ ఫిల్మ్ ఇది.
ఇందులో ఐరా అనే పాత్రలో నటించాను. ఈ క్యారెక్టర్లో నటించడాన్ని ఆస్వాదించాను’ అని నాయిక క్యాథరీన్ ట్రెసా చెప్పింది. దర్శకుడు వశిష్ఠ్ మాట్లాడుతూ…‘ఇలాంటి భారీ చిత్రాన్ని రూపొందించే ధైర్యాన్నిచ్చింది హీరో కళ్యాణ్ రామ్. సందేహించిన ప్రతి సందర్భంలో నువ్వు చేయగలవు అని ప్రోత్సహించారు. మా బింబిసారుడు యుద్ధం చేస్తే ఎలా ఉంటుందో ఆగస్టు 5న థియేటర్లో చూస్తారు’ అని అన్నారు. కళ్యాణ్ రామ్ మాట్లాడుతూ..‘చందమామ కథల్ని చదువుకున్నాం, పెద్దవాళ్లు చెప్పగా విన్నాం, తెరపై చూశాం. సోషియో ఫాంటసీ నేపథ్యంలో తెలుగులో ఎన్నో అందమైన కథలు తెరకెక్కాయి. వాటిని మీరంతా ఆదరించారు. టైమ్ ట్రావెల్తో సాగే అలాంటి అందమైన సినిమా ఇది. మీరంతా ఇష్టపడే చిత్రమవుతుంది’ అన్నారు. ఈ కార్యక్రమంలో నటుడు శ్రీనివాసరెడ్డి తదితరులు పాల్గొన్నారు.