భాగ్యనగరంలో బాలకృష్ణ హంగామా

ఓ వైపు సినిమాలు, మరోవైపు రాజకీయాలు, ఇంకోవైపు కేన్సర్‌ హాస్పిటల్‌.. క్షణం తీరిక లేకుండా గడుపుతున్నారు బాలకృష్ణ. మూడు బాధ్యతల్నీ సమర్థవంతంగా నెరవేరుస్తున్నారనడానికి ఆయా రంగాల్లో ఆయన విజయాలే నిదర్శనం. ఏపీలో ఎన్నికల వేడి మొదలైంది.

ఓ వైపు సినిమాలు, మరోవైపు రాజకీయాలు, ఇంకోవైపు కేన్సర్‌ హాస్పిటల్‌.. క్షణం తీరిక లేకుండా గడుపుతున్నారు బాలకృష్ణ. మూడు బాధ్యతల్నీ సమర్థవంతంగా నెరవేరుస్తున్నారనడానికి ఆయా రంగాల్లో ఆయన విజయాలే నిదర్శనం. ఏపీలో ఎన్నికల వేడి మొదలైంది. వచ్చే నెల నుంచి బాలకృష్ణ తన నియోజకవర్గం హిందూపురంలో బిజీబిజీ. అందుకే.. బాబీ దర్శకత్వంలో చేస్తున్న ‘ఎన్‌బీకే 109’ షూటింగ్‌ను చకచకా పూర్తిచేసేపనిలో ఉన్నారు బాలయ్య.

ఇప్పటికే ఈ సినిమా షూటింగ్‌ 30శాతం పూర్తిచేసుకుంది. ప్రస్తుతం హైదరాబాద్‌ అన్నపూర్ణ స్టూడియోస్‌లో వేసిన భారీ సెట్‌లో ఈ సినిమా షూటింగ్‌ శరవేగంగా జరుగుతున్నది. బాలయ్యపై కీలక సన్నివేశాలతోపాటు ఓ భారీ యాక్షన్‌ ఎపిసోడ్‌ని కూడా ఈ సెట్‌లోనే తెరకెక్కిస్తున్నారు దర్శకుడు కె.ఎస్‌.రవీంద్ర(బాబీ).

వచ్చే నెల నుంచి బాలకృష్ణ అందుబాటులో ఉండరు గనుక, ఆ నెలలో ఆయన లేని సన్నివేశాలు చిత్రీకరిస్తారని సమాచారం. దానికోసం మరో షెడ్యూల్‌ కూడా ప్లాన్‌ చేశారు బాబీ. ఎట్టిపరిస్థితుల్లో రానున్న దసరాకి ఈ సినిమాను విడుదల చేయడానికి నిర్మాతలు సన్నాహాలు చేస్తున్నారు. దుల్కర్‌ సల్మాన్‌ కీలక పాత్రలో నటించనున్న ఈ చిత్రంలో బాబీడియోల్‌ విలన్‌గా నటిస్తున్న విషయం తెలిసిందే. త్రిష, మీనాక్షి చౌదరి, శద్ధాశ్రీనాథ్‌ కథానాయికలుగా నటిస్తున్నట్టు వార్తలు వినిపిస్తున్నాయి. అలాగే ఊర్వశీ రౌతాలా కూడా ఇందులో ప్రత్యేక పాత్ర పోషిస్తున్నట్టు తెలిసింది. సితార ఎంటర్‌టైన్‌మెంట్స్‌ పతాకంపై సూర్యదేవర నాగవంశీ, సాయిసౌజన్య ఈ చిత్రాన్ని నిర్మిస్తున్న విషయం తెలిసిందే.