కథాంశాల ఎంపికలో కొత్తదనానికి పెద్దపీట వేస్తారు అగ్ర హీరో కల్యాణ్రామ్. జయాపజయాలకు అతీతంగా విభిన్నమైన కాన్సెప్ట్లను ఎంచుకొని సినిమాలు చేస్తుంటారు. ఆయన కథానాయకుడిగా అభిషేక్ నామా దర్శకత్వంలో తెరకెక్కించిన తాజా చిత్రం ‘డెవిల్ ఈ నెల 29న ప్రేక్షకుల ముందుకురానుంది. ఈ సందర్భంగా మంగళవారం కల్యాణ్రామ్ పాత్రికేయులతో ముచ్చటించారు. ఆ విశేషాలివి..
తొలుత ఈ కథ విన్నప్పుడు 1940 నేపథ్యం చాలా కొత్తగా అనిపించింది. షెర్లాక్ హోమ్స్ సినిమాల తరహాలో సాగే ఇన్వెస్టిగేటివ్ థ్రిల్లర్ కథాంశమిది. హీరో బేసిక్ క్యారెక్టరైజేషన్, బ్యాక్డ్రాప్ అలాగే ఉంచి కమర్షియల్ పంథాలో స్క్రిప్ట్లో మార్పులు చేయమని రచయిత శ్రీకాంత్ విస్సాకు సూచనలు చేశాను. చెప్పినట్లుగానే ఆయన స్క్రిప్ట్పై వర్క్ చేసి వాణిజ్య పంథాలో తీర్చిదిద్దారు. ఈ సినిమా మేకింగ్కు ఏడాది సమయం పట్టింది.
కొత్త కాన్సెప్ట్లతో సినిమాలు చేయాలని ఎప్పుడూ ప్రయత్నిస్తుంటాను. ఒక్కోసారి వాటిలో కమర్షియల్ ఎలిమెంట్స్ లోపించడం వల్ల మిస్ఫైర్ అవుతుంటాయి. ‘అమిగోస్’ సినిమా విషయంలో అదే జరిగింది. ఆ కథను చెప్పే క్రమంలో కొన్ని వాణిజ్య అంశాలు మిస్ అయ్యాయి. అందుకే ‘డెవిల్’ సినిమా విషయంలో చాలా జాగ్రత్తలు తీసుకున్నాం. పక్కా కమర్షియల్ ఎలిమెంట్స్తో సినిమాను రూపొందించాం. నా క్యారెక్టర్లో భారతీయత కనిపిస్తుంది. ఇప్పటివరకు వచ్చిన గూఢచారి కథల్లో ఇదొక వైవిధ్యమైన కథ.
నా పాత్రలో ఎలాంటి నెగెటివ్ అంశాలు కనిపించవు. ప్రతీ విషయాన్ని డీటెయిల్డ్గా వర్క్ చేసి స్క్రిప్ట్ సిద్ధం చేశాం. ‘అర్జున్ రెడ్డి’ ఫేమ్ హర్షవర్ధన్ రామేశ్వర్ అందించిన సంగీతం, బ్యాక్గ్రౌండ్ స్కోర్ ఈ సినిమాకు ప్రధానాకర్షణగా నిలుస్తుంది. హీరోయిన్లు సంయక్తా మీనన్, మాళవికా నాయర్ పాత్రలకు కూడా చాలా ప్రాముఖ్యత ఉంటుంది. క్యారెక్టర్స్ విషయంలో నేను ప్రత్యేకమైన కసరత్తులు ఏమీ చేయను. క్యారెక్టర్ కొత్తగా అనిపిస్తే డైలాగ్ డెలివరీ మొదలుకొని, నటించే పద్దతి వరకు అన్నీ మారిపోతాయి. ఈ సినిమాలో దేశభక్తి అంశం ప్రధానంగా ఉంటుంది. అదేమిటో సినిమా చూసి తెలుసుకోవాల్సిందే.
మేము చేసే సినిమాలు గొప్పగా ఉండాలని నేను, తారక్ అనుకుంటాం. సినిమా అవుట్పుట్ విషయంలో చాలా జాగ్రత్తలు తీసుకుంటాం. తారక్ ‘దేవర’ విషయంలో గ్రేట్ ఎఫర్ట్స్ పెడుతున్నారు. నటుడిగా ఇరవై ఏండ్ల ప్రయాణం పూర్తయింది. ఈ ప్రయాణంలో చాలా విషయాలు నేర్చుకున్నా. తండ్రిగా, భర్తగా, నటుడిగా కూడా గొప్ప పరిణితి సాధించానని భావిస్తున్నా. ‘డెవిల్’ సినిమాకు వచ్చే రెస్పాన్స్ చూసిన తర్వాత సీక్వెల్ గురించి ఆలోచిస్తాం.