ఓ వ్య‌క్తి నా వెంట‌ప‌డి వేధించాడు.. న‌న్ను కొట్టాడు: దంగ‌ల్ న‌టి ఎమోష‌న‌ల్‌

దంగల్ నటి ఫాతిమా | తనపై సినిమా ఇండస్ట్రీలోని వేధింపుల‌తో పాటు త‌న‌పై బయట జరిగిన దాడి గురించి కూడా గుర్తు చేసుకుంది.

April 30, 2021 / 11:01 PM IST

ఓ వ్య‌క్తి నా వెంట‌ప‌డి వేధించాడు.. న‌న్ను కొట్టాడు: దంగ‌ల్ న‌టి ఎమోష‌న‌ల్‌

సినిమా ఇండస్ట్రీ గురించి.. ఇక్కడ జరిగే అవమానాలు, అరాచకాల గురించి ఇప్పటికే చాలా మంది హీరోయిన్లు ముందుకొచ్చి మాట్లాడారు. తమకు జరిగిన చేదు సంఘటనలను మీడియా ముందుకొచ్చి ధైర్యంగా చెప్పుకుంటున్నారు. ఈ క్రమంలోనే ఇప్పుడు దంగల్ నటి ఫాతిమా సనా షేక్‌ కూడా తనపై సినిమా ఇండస్ట్రీలోని వేధింపుల‌తో పాటు త‌న‌పై బయట జరిగిన దాడి గురించి కూడా గుర్తు చేసుకుంది.

ఓ సారి తాను జిమ్‌ నుంచి తిరిగి వస్తున్న సమయంలో ఒకడు తనను ఫాలో అయ్యాడని.. ఎందుకు ఫాలో అవుతున్నావ్ అని అడిగితే నా ఇష్టం.. చూస్తా నీకెందుకు అని క‌రుకుగా సమాధానం చెప్పాడ‌ని తెలిపింది. కోపం వ‌చ్చి అత‌ని చెంప మీద కొడితే.. అత‌ను కూడా త‌న మొహంపై గ‌ట్టిగా పంచ్ ఇచ్చాడ‌ని బాధ‌ప‌డింది. ఆ యువ‌కుడు కొట్టిన దెబ్బ‌తో కింద ప‌డిపోయాన‌ని, ఆ త‌ర్వాత లేచి నాన్న‌కు ఫోన్ చేసి చెప్పేలోపు అత‌డు పారిపోయాడ‌ని తెలిపింది. అది త‌న జీవితంలో మ‌రిచిపోలేని చేదు సంఘ‌ట‌న అని చెప్పింది. ఇండస్ట్రీలోనూ తనకు చాలా చేదు సంఘటనలు ఎదురయ్యాయి అని చెప్పింది ఈమె.

ఇండ‌స్ట్రీలో అవ‌కాశాల కోసం త‌న‌ను కొంత‌మంది ద‌ర్శ‌కులు వేధించిన‌ట్లు ఫాతిమా స‌నా షేక్ తెలిపింది. చూడ్డానికి బాగున్నావ్ కానీ అవ‌కాశం కావాలంటే త‌మ‌తో ప‌డుకోవాల్సిందేనని ప‌లువురు ద‌ర్శ‌కులు ఓపెన్‌గా అడిగేశార‌ని చెప్పుకొచ్చింది. కుద‌ర‌ద‌ని చెప్పినందుకు త‌న‌కు అవ‌కాశాలు రాకుండా చేశార‌ని, వ‌చ్చిన అవ‌కాశాలు కూడా పోగొట్టే ప్ర‌య‌త్నం చేశార‌ని చెప్పింది. తనకు మూడేళ్ల వయసు ఉన్నప్పటి నుంచి కూడా ఇలాంటి ప్రతికూల పరిస్థితులను ఎదుర్కొంటూనే ఉన్నానని తెలిపింది. ఈమె అమీర్ ఖాన్ దంగల్ సినిమాలో కీలక పాత్రలో నటించింది. అలాగే థగ్స్ ఆఫ్ హిందుస్తాన్ సినిమాలోనూ నటించింది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి