అనిక సురేంద్రన్, అర్జున్ దాస్, సూర్య వశిష్ట ప్రధాన పాత్రల్లో నటిస్తున్న సినిమా ‘బుట్ట బొమ్మ’. ఈ చిత్రాన్ని ఫార్చ్యూన్ ఫోర్ సినిమాస్తో కలిసి సితార ఎంటర్టైన్మెంట్స్ సంస్థ నిర్మిస్తున్నది. సూర్యదేవర నాగవంశీ, సాయి సౌజన్య నిర్మాతలు. శౌరి చంద్రశేఖర్ రమేష్ దర్శకుడు. ఈ నెల 26న ఈ సినిమా ప్రేక్షకుల ముందుకురానుంది. ఈ సందర్భంగా చిత్రంలో నటించిన అనుభవాలు తెలిపారు నటుడు అర్జున్ దాస్. ఆయన మాట్లాడుతూ…“ఖైదీ’, ‘అంధఘారం’, ‘మాస్టర్’ చిత్రాలతో నటుడిగా మంచి పేరొచ్చింది. ఇప్పుడు సితార సంస్థలో నటించడం సంతోషంగా ఉంది. ఈ చిత్రంలో నేను ఆర్కే అనే పాత్రలో కనిపిస్తాను. నిర్మాత వంశీ ఈ సినిమాలో నటించమని ఫోన్ చేశారు.
ఈ పాత్రకు నేనైతే బాగుంటుందని ఆయన నమ్మకం పెట్టుకున్నారు. దర్శకుడు రమేష్ చెన్నై వచ్చి కథ, నా పాత్ర గురించి చెప్పారు. అలా ఈ ప్రాజెక్ట్లోకి అడుగుపెట్టాను. ఇది రీమేక్ అయినా తెలుగు ప్రేక్షకులకు నచ్చేలా మంచి మార్పులు చేశారు. ఇక్కడి నేటివిటీతో సినిమా ఆద్యంతం సాగుతుంది. సినిమా అన్ని వర్గాల ప్రేక్షకులను అలరించేలా ఉంటుంది. ఇప్పటిదాకా డబ్బింగ్ చిత్రాలతో టాలీవుడ్కు పరిచయం అయ్యాను. హైదరాబాద్, విశాఖ వెళ్లినప్పుడు అక్కడి ప్రజలు నన్ను గుర్తుపట్టడం ఆశ్చర్యపరిచింది. ఇప్పుడు నేరుగా తెలుగు సినిమాలో నటించడం సంతృప్తిగా ఉంది. ఈ సినిమాలో నా పాత్రకు సొంతంగా డబ్బింగ్ చెప్పుకున్నాను. క్యారెక్టర్ కొత్తగా ఉంటే ఎలాంటి పాత్రలోనైనా నటించడానికి సిద్ధం. విలన్ పాత్రలైనా సరే అభ్యంతరం లేదు’. అన్నారు.