Mahesh Manjrekar | ఓ మరాఠీ చిత్రంలో అసభ్యకరమైన సన్నివేశాల్లో నటించినందుకు బాలీవుడ్ నటుడు మహేశ్ మంజ్రేకర్ ప్రొటెక్షన్ ఆఫ్ ఛైల్డ్ ఫ్రమ్ సెక్సువల్ అఫెన్సెస్ (పోక్సో ) కేసులో ఇరుక్కున్నాడు. ఈ సన్నివేశంలో పిల్లలు ఉండటంతో ఆయనపై కేసు నమోదైంది. కేసు రిజిస్టర్ అయ్యాక తనను అరెస్టు చేయవద్దంటూ బాంబే హైకోర్టును ఆశ్రయించారు మహేశ్ మంజ్రేకర్. వాదనలు విన్న న్యాయస్థానం మంగళవారం మహేశ్ మంజ్రేకర్ను గానీ గానీ ఆ చిత్ర బృందంలోని సభ్యులను గానీ అరెస్టు చేయవద్దంటూ ఆదేశాలు ఇచ్చింది.
తాజాగా నయ్ వరణ్భాత్ లోంచా కోన్ నయ్ కొంచా అనే మరాఠీ చిత్రంలో మహేశ్ మంజ్రేకర్ నటించాడు. ఈ సినిమా ట్రైలర్లో మైనర్లపై కొన్ని అభ్యంతరకర సన్నివేశాలు ఉన్నాయంటూ ఇటీవల కేసు రిజిస్టర్ అయ్యింది. ముంబైలోని మహిమ్ పోలీస్ స్టేషన్లో ఆయనపై ఎఫ్ఐఆర్ దాఖలైంది. ఈ కేసుపై బాంబే హైకోర్టు మంగళవారం విచారణ చేపట్టింది. ఈ సందర్భంగా సినిమాలో ఇబ్బందికర సన్నివేశాలు లేవని, అయినప్పటికీ ట్రైలర్ను యూట్యూబ్ నుంచి తొలగించినట్లు సినిమా టీమ్ తరఫున న్యాయవాది బాంబే హైకోర్టుకు తెలిపారు. సినిమాకు సెన్సార్ బోర్డు సర్టిఫికేషన్ కూడా ఇచ్చిందని న్యాయస్థానం దృష్టికి తీసుకొచ్చారు. ఇరువైపుల వాదనలు విన్న బాంబే హైకోర్టు మహేశ్, మంజ్రేకర్, చిత్ర బృందానికి ఊరటనిచ్చింది. వారిపై ఎలాంటి చర్యలు తీసుకోవద్దని పోలీసులను ఆదేశించింది.
గోపీచంద్ ఒక్కడున్నాడు సినిమాతో టాలీవుడ్కు ఎంట్రీ ఇచ్చిన మహేశ్ మంజ్రేకర్.. తెలుగులో హోమం, డాన్ శీను, అదుర్స్, అఖిల్, గుంటూరు టాకీస్ వంటి సినిమాల్లో నటించాడు.