Pallavi Dey | సినీ ఇండస్ట్రీలో వరుస మరణాలు కలవరపెడుతున్నాయి. ఈ వారంలోనే ఇద్దరు వర్ధమాన నటీమణులు మృతిచెందగా.. ఇవాళ మరో నటి అనుమానాస్పద స్థితిలో మరణించింది. కోల్కతాలోని గార్ఫా ప్రాంతంలోని తన ఫ్లాట్లో బెంగాలీ నటి పల్లవి డే ఆత్మహత్య చేసుకుంది. ఆదివారం ఉదయం సీలింగ్ ఫ్యాన్కు వేలాడుతూ కనిపించింది. ఘటనాస్థలిని పరిశీలించిన పోలీసులు.. అనుమానాస్పద మృతిగా కేసు నమోదు చేసుకున్నారు. మృతదేహాన్ని పోస్టుమార్టం నిమిత్తం ఆస్పత్రికి తరలించారు.
అయితే బెంగాలీ నటి పల్లవి డే ఆత్మహత్య చేసుకున్నట్లు తమ ప్రాథమిక విచారణలో తెలిసిందని పోలీసులు తెలిపారు. ఆత్మహత్యకు ప్రేమ వ్యవహారమే కారణమా అన్న కోణంలోనూ పోలీసులు దర్యాప్తు చేస్తున్నారు. ఈ క్రమంలో పల్లవి బాయ్ఫ్రెండ్ను కూడా పోలీసులు విచారించారు. కాగా పుట్టిన రోజునాడే కేరళలోని కాసరగోడ్కు చెందిన నటి, మోడల్ షహానా అనుమానస్పద స్థితిలో మరణించింది. గురువారం రాత్రి తన అపార్ట్మెంట్లోని కిటికీ ఊచలకు షహానా మృతదేహం వేలాడుతూ కనిపించింది. అయితే తన అల్లుడే షహనాను హత్య చేశాడని ఆమె తల్లి ఆరోపించింది. ఇదిలా ఉంటే రియాలిటీ డ్యాన్స్ షో ఆట సీజన్ 1తో పాపులర్ అయిన టీనా సాధు అకస్మాత్తుగా మరణించింది.