Artificial Trailer | చాట్‌జీపీటీ సృష్టికర్త బ‌యోపిక్.. ఆస‌క్తిక‌రంగా ‘ఆర్టిఫిషియల్’ టీజర్ ట్రైలర్!

Artificial Movie | ప్రపంచాన్ని కుదిపేస్తున్న ఆర్టిఫిషియల్ ఇంటెలిజెన్స్ (AI) సంచలనం, ప్రముఖ చాట్‌జీపీటీ (ChatGPT) సృష్టికర్త అయిన ఓపెన్‌ఏఐ (OpenAI) సీఈవో సామ్ ఆల్ట్‌మాన్ (Sam Altman) జీవిత కథాంశంతో తెరకెక్కుతున్న హాలీవుడ్ చిత్రం 'ఆర్టిఫిషియల్' (Artificial).

Artificial Movie | ప్రపంచాన్ని కుదిపేస్తున్న ఆర్టిఫిషియల్ ఇంటెలిజెన్స్ (AI) సంచలనం, ప్రముఖ చాట్‌జీపీటీ (ChatGPT) సృష్టికర్త అయిన ఓపెన్‌ఏఐ (OpenAI) సీఈవో సామ్ ఆల్ట్‌మాన్ (Sam Altman) జీవిత కథాంశంతో తెరకెక్కుతున్న హాలీవుడ్ చిత్రం ‘ఆర్టిఫిషియల్’ (Artificial). తాజాగా ఈ చిత్రానికి సంబంధించిన అధికారిక టీజర్ ట్రైలర్‌ను మేక‌ర్స్ విడుద‌ల చేశారు. కేవలం సాధారణ బయోపిక్‌లా కాకుండా, సిలికాన్ వ్యాలీ తెరవెనుక రాజకీయాలు మరియు ఆర్టిఫిషియల్ ఇంటెలిజెన్స్ భవిష్యత్తుపై మానవాళి ఎదుర్కోబోయే పెను ముప్పులను ప్రతిబింబించేలా దీన్ని ఒక థ్రిల్లర్ జోనర్‌లో దీన్ని రూపొందించారు.

నవంబర్ 2023లో టెక్ ప్రపంచాన్ని దిగ్భ్రాంతికి గురిచేసిన హై-వోల్టేజ్ కార్పొరేట్ సంక్షోభం ఈ చిత్రానికి ప్రధాన కేంద్ర బిందువు. ఓపెన్‌ఏఐ బోర్డు ఎలాంటి ముందస్తు సంకేతాలు ఇవ్వకుండా సామ్ ఆల్ట్‌మాన్‌ను ఊహించని రీతిలో సీఈవో పదవి నుంచి తొలగించడం, ఆ తర్వాత కేవలం ఐదు రోజుల వ్యవధిలోనే కంపెనీ ఉద్యోగులు, ప్రముఖ పెట్టుబడిదారుల నుంచి వ్యక్తమైన తీవ్రమైన ఒత్తిడితో ఆయన తిరిగి అదే పదవిని అధిష్టించడం వంటి నాటకీయ పరిణామాల చుట్టూ ఈ కథ తిరుగుతుంది. టెక్ దిగ్గజాల మధ్య నడిచిన ఆధిపత్య పోరాటాలు, బోర్డు రూమ్ కుట్రలను ఈ చిత్రంలో అత్యంత వాస్తవికంగా ఆవిష్కరించబోతున్నారు. ‘ది సోషల్ నెట్‌వర్క్’ చిత్రంతో గుర్తింపు తెచ్చుకున్న ప్రముఖ హాలీవుడ్ నటుడు ఆండ్రూ గార్ఫీల్డ్ (Andrew Garfield) ప్రధాన పాత్రలో సామ్ ఆల్ట్‌మాన్‌గా నటిస్తున్నారు.

ప్రసిద్ధ దర్శకుడు లూకా గ్వాడగ్నినో (Luca Guadagnino) ఈ చిత్రానికి దర్శకత్వం వహించగా, ‘ఎస్‌ఎన్‌ఎల్’ (SNL) ఫేమ్ సైమన్ రిచ్ అద్భుతమైన స్క్రిప్ట్ అందించారు. టెక్ దిగ్గజం ఎలాన్ మస్క్ పాత్రలో ఐక్ బారిన్‌హోల్ట్జ్, ఓపెన్‌ఏఐ మాజీ సీటీవో మీరా మురతి పాత్రలో మోనికా బార్బరో, మాజీ చీఫ్ సైంటిస్ట్ ఇల్యా సుత్స్కేవర్ పాత్రలో యూరా బోరిసోవ్, మరియు ఏఐ పయనీర్ జెఫ్రీ హింటన్ పాత్రలో మార్క్ రైలన్స్ నటిస్తున్నారు. వీరితో పాటు జాసన్ స్వార్జ్‌మాన్, కూపర్ హాఫ్‌మన్ తదితరులు ఇతర ముఖ్య పాత్రల్లో కనిపించనున్నారు. అక్టోబర్‌లో జరగనున్న న్యూయార్క్ ఫిల్మ్ ఫెస్టివల్‌లో ఈ చిత్ర ప్రీమియర్ ప్రదర్శించబడనుండగా, క్రిస్మస్ కానుకగా డిసెంబర్ 25న ఈ సినిమాను థియేటర్లలో విడుదల చేయనున్నారు.