Akkineni Amala | యంగ్ అండ్ వెర్సటైల్ హీరో శర్వానంద్ హీరోగా ప్రేక్షకుల ముందుకు వచ్చిన చిత్రం ఒకే ఒక జీవితం. నూతన దర్శకుడు శ్రీ కార్తీక్ ఈ చిత్రానికి దర్శకత్వం వహించాడు. అమల అక్కినేని, రీతూ వర్మ, ప్రియదర్శి, వెన్నెల కిషోర్ కీలక పాత్రలు పోషించారు. విభిన్న కథాంశాలతో ప్రేక్షకులను అలరించే ప్రముఖ నిర్మాణ సంస్థ డ్రీమ్ వారియర్ పిక్చర్స్ ఈ చిత్రంతో తెలుగులో అడుగుపెట్టింది. ఎస్ఆర్ ప్రకాశ్ బాబు, ఎస్ఆర్ ప్రభు నిర్మించిన ఈ సినిమా సెప్టెంబర్ 9న థియేటర్లలో విడుదలై బ్లాక్ బస్టర్ విజయాన్ని అందుకుంది. ఈ నేపథ్యంలో అమల అక్కినేని విలేఖరుల సమవేశంలో పాల్గొని సినిమా విశేషాలు పంచుకున్నారు.
‘ఒకే ఒక జీవితం’ చూసిన తర్వాత ఎమోషనల్ మదర్ పాత్రలకు మీరే కరెక్ట్ ఛాయిస్ అంటున్నారు.. భవిష్యత్లో ఇలాంటి పాత్రలు చేస్తారా ?
ఒక నటిగా ప్రేక్షకులకు నచ్చడం కంటే గొప్ప విషయం ఏముటుంది. ప్రేక్షకులకు నచ్చే పాత్రలు చేయడానికి నేను ఎప్పుడూ సిద్ధంగా ఉంటాను. అయితే ఇలాంటి పాత్రలు చేయడం సవాలుతో కూడుకున్నది.
లైఫ్ ఈజ్ బ్యూటిఫుల్ తర్వాత విరామం రావడానికి కారణం ?
లైఫ్ ఈజ్ బ్యూటిఫుల్ తర్వాత రెండు మలయాళం, మూడు హిందీ సినిమాలు, ఒక వెబ్ సిరీస్ చేశాను. ప్రతి భాషలో ప్రాజెక్ట్స్ చేస్తున్నాను. కానీ తెలుగులో లైఫ్ ఈజ్ బ్యూటిఫుల్ తర్వాత ఇదే. అయితే గత ఐదేళ్లుగా అన్నపూర్ణ ఫిల్మ్ అండ్ మీడియా నేనే చూసుకుంటున్నాను. వందలమంది విద్యార్ధుల భవిష్యత్ బాధ్యత నాపై ఉంది. ఈ బాధ్యతను పక్కన పెట్టి నటనలో బిజీగా ఉండటం కష్టం. అయితే నా మనసుకు హత్తుకునే కథ విన్నపుడు, ఆ పాత్రకి నేను కరెక్ట్ అనిపిస్తే మాత్రం తప్పకుండా చేస్తాను. ఒకే ఒక జీవితం అలా మనసుకు నచ్చిన కథే. ఒక నిజాయితీతో తీసిన సినిమా ప్రేక్షకులకు ఎప్పుడూ నచ్చుతుంది. ఒకే ఒక జీవితం మరోసారి దాన్ని రుజువుచేసింది.
సినిమా చూసిన తర్వాత నాగార్జున ఎమోషనల్గా మాట్లాడటం ఎలా అనిపించింది ?
‘ఒకే ఒక జీవితం’ హృదయాన్ని హత్తుకునే సినిమా అని నాగార్జునను ముందే ప్రిపేర్ చేశాను. ఈ సినిమా చూశాక హార్ట్ ఓపెన్ అవుతుందని చెప్పాను. నాగార్జున గారికి వాళ్ల అమ్మ అన్నపూర్ణమ్మ గుర్తుకు వచ్చారు. నిజంగా అది గ్రేట్ ఫీలింగ్. ఈ సినిమా చూసిన ప్రతిఒక్కరికీ వారి మనసులకు దగ్గరైనవారు గుర్తుకు వస్తారు. ‘ఒకే ఒక జీవితం’లోని బ్యూటీ అదే.
టైం మిషన్ లో వెళ్లే అవకాశం వస్తే ఏ టైంలోకి వెళ్తారు ?
పదేళ్లు భవిష్యత్లోకి వెళ్తాను(నవ్వుతూ). ఇప్పుడు చాలా పనులు చేస్తున్నాం. ఆ పనులు ఎలాంటి ఫలితాన్ని ఇచ్చాయో చూడాలని ఉంది. అవి విజయాన్ని సాధించాయో లేదో తెలుసుకోవాలని ఉంది(నవ్వుతూ)
విధి, కాలాన్ని నిజ జీవితంలో ఎలా నిర్వచిస్తారు, విధితో సంబంధం లేకుండా మనిషి తన జీవితాన్ని గెలుచుకోగలడా ?
జీవితంలో ప్రతి అవకాశం కోసం ప్రయత్నిస్తాం. ఒక ప్రయత్నంలో విజయం, మరో ప్రయత్నంలో అపజయం ఉంటుంది. అపజయం, జయం కోసం మనల్ని సిద్ధం చేస్తోంది. జీవితంలో జయానికి అపజయానికి సమానమైన ప్రాధాన్య ఉంటుందని భావిస్తాను. అపజయం చాలా విషయాల్ని నేర్పిస్తుంది. లైఫ్ టైమ్ను ఒక రిహార్సల్గా భావిస్తే సరైన సమయం వస్తుందని నా ఆలోచన. ఇలాంటి ఒక సక్సెస్ రావడానికి నేను చాలా ప్రయత్నాలు చేసి ఉంటాను. కొన్ని ప్రయత్నాలు విజయాన్ని ఇవ్వలేకపోవచ్చు. కానీ ఆ అనుభవాలన్నీ విజయానికి బాటలు వేస్తాయని భావిస్తాను.
తెరపై మీ పాత్ర చూసుకున్నపుడు మీ అమ్మగారితో ఉన్న జ్ఞాపకాలు గుర్తుకు వచ్చాయా ?
ఈ సినిమా చూసి మా అమ్మగారు నన్ను చాలా గట్టిగా కౌగలించుకుకొని ‘ఐ యామ్ సో ప్రౌడ్ అఫ్ యూ’ అన్నారు. ఇది ఎప్పటికీ మర్చిపోలేను. నాగార్జునతో పాటు అఖిల్ , మా కుటుంబ సభ్యులందరూ ఈ చిత్రానికి చాలా డీప్గా కనెక్ట్ అయ్యారు. నన్ను చూడకుండా కేవలం కథ, పాత్రలతో ప్రయాణం చేశారు. గొప్ప తృప్తిని, హాయిని ఇచ్చిన సినిమా ‘ఒకే ఒక జీవితం.
బ్లూ క్రాస్ పనులు చూసుకోవడానికి సమయం కుదురుతుందా ?
బ్లూ క్రాస్ అఫ్ హైదరాబాద్కి ప్రపంచ స్థాయి గుర్తింపు రావడం ఆనందంగా ఉంది. మంచి వైద్యులు, మేనేజ్మెంట్ సిబ్బంది ఉంది. బ్లూ క్రాస్ గొప్ప స్థాయికి వచ్చింది. నేను ఉన్నా లేకపోయినా కూడా అద్భుతమైన సేవలు అందిస్తుంది. అయితే నా తరఫు నుంచి ప్రతి శనివారం స్వచ్ఛందంగా వెళ్లి పని చేస్తాను.
ఇంట్లో సినిమాలు గురించి మాట్లాడుతుంటారా ?
నాగార్జున, చైతూ, అఖిల్ వాళ్ల ప్రాజెక్ట్స్ ప్లానింగ్స్ గురించి మాట్లాడుతుంటారు. నేను వింటాను. అయితే ఫిల్మ్ స్కూల్లో ఎక్కువగా సినిమాలు గురించి చర్చిస్తుంటాం. విద్యార్ధులతో కలసి సినిమా గురించి లోతైన విశ్లేషణలు ఫిల్మ్ స్కూల్ లోనే ఎక్కువగా జరుపుతుంటాం.
నాగార్జునతో కలిసి నటించే అవకాశం వస్తే చేస్తారా ?
ఇంట్లో ఎప్పుడూ కలిసే ఉంటాం. మళ్ళీ స్క్రీన్పై వద్దండీ.( నవ్వుతూ). ఇటీవల ఆయన నటించిన బ్రహ్మాస్త్ర చూశాను. నాకు చాలా నచ్చింది. నాగార్జున ప్రజన్స్ కొంత సమయమే అయినా చాలా ఇంపాక్ట్ క్రియేట్ చేసింది. ముంబై నుంచి కూడా చాలా మంచి రెస్పాన్స్ రావడం ఆనందంగా వుంది.