Visit:
Akhanda OTT | నటసింహం నందమూరి బాలకృష్ణ, మాస్ డైరెక్టర్ బోయపాటి శ్రీను కాంబినేషన్లో తెరకెక్కిన భారీ యాక్షన్ మూవీ ‘అఖండ 2’ డిసెంబర్ 12 నుంచి థియేటర్లలో సందడి చేస్తోంది. తొలి భాగం సూపర్ హిట్ కావడంతో ఈ సీక్వెల్పై అభిమానుల్లో భారీ అంచనాలు నెలకొన్నాయి. అయితే రిలీజ్ సమయంలో సినిమా కొన్ని ఇబ్బందులను ఎదుర్కొంది. మొదట ఈ సినిమాను డిసెంబర్ 5న విడుదల చేయాలని ప్లాన్ చేసిన మేకర్స్.. ఆర్థిక వివాదాల కారణంగా రిలీజ్ను వాయిదా వేశారు. వారం ఆలస్యంగా డిసెంబర్ 12న థియేటర్లలోకి వచ్చిన ‘అఖండ 2’ ప్రస్తుతం మిశ్రమ స్పందనతో బాక్సాఫీస్ వద్ద పరుగులు పెడుతోంది. ఈ నేపథ్యంలో ఇప్పుడు సినిమా ఓటీటీ రిలీజ్పై కీలక అప్డేట్ వైరల్ అవుతోంది.
మీడియా రిపోర్ట్స్ ప్రకారం, ‘అఖండ 2’ డిజిటల్ స్ట్రీమింగ్ డేట్ను మేకర్స్ దాదాపు ఫైనల్ చేసినట్లు తెలుస్తోంది. ఈ సినిమా ప్రముఖ ఓటీటీ ప్లాట్ఫామ్ నెట్ఫ్లిక్స్లో విడుదల కానుందని టాక్ వినిపిస్తోంది. అయితే దీనిపై ఇప్పటివరకు అధికారిక ప్రకటన మాత్రం రాలేదు. ఇండస్ట్రీ వర్గాల సమాచారం ప్రకారం, ‘అఖండ 2’ నాలుగు వారాల థియేటర్-టు-ఓటీటీ విండోను పాటించనుంది. అలా అయితే ఈ సినిమా 2026 జనవరి 9 నాటికి డిజిటల్ రిలీజ్ అయ్యే అవకాశముంది. అయితే థియేటర్ రిలీజ్ ఒక వారం ఆలస్యం కావడంతో ఓటీటీ డేట్లో స్వల్ప మార్పులు ఉండొచ్చని కూడా చెబుతున్నారు. సంక్రాంతి సీజన్ను టార్గెట్ చేస్తూ నెట్ఫ్లిక్స్ ఈ సినిమాను భారీగా ప్రమోట్ చేయాలని భావిస్తున్నట్లు సమాచారం.
‘అఖండ 2’లో బాలకృష్ణ అఘోరా పాత్రలో మరోసారి పవర్ఫుల్ నటనతో అభిమానులను ఉర్రూతలూగించారు. దివ్యశక్తులు కలిగిన పాత్రలో ఆయన యాక్షన్ సన్నివేశాలు ప్రత్యేక ఆకర్షణగా నిలిచాయి. ఈ సీక్వెల్లో విలన్గా ఆది పినిశెట్టి అతీంద్రియ శక్తులు కలిగిన రహస్య పాత్రలో నటించి మెప్పించాడు.ఇక ఈ సినిమాలో సంయుక్త మీనన్, హర్షాలీ మల్హోత్రా, కబీర్ దుహాన్ సింగ్, శాశ్వత ఛటర్జీ తదితరులు కీలక పాత్రల్లో కనిపించారు. అయితే ఇటీవలి రోజుల్లో బాక్సాఫీస్ వసూళ్లు కొంత తగ్గడం మేకర్స్తో పాటు అభిమానుల్లో కూడా ఆందోళన కలిగిస్తోంది. 65 ఏళ్ల వయసులోనూ బాలకృష్ణ యంగ్ హీరోలకు పోటీ ఇస్తూ వరుస సినిమాలతో దూసుకుపోతున్నారు. ఇప్పటికే హ్యాట్రిక్ హిట్స్ అందుకున్న బాలయ్య.. మరో రెండు సినిమాలు సక్సెస్ అయితే డబుల్ హ్యాట్రిక్ ఆయన ఖాతాలో పడనుంది. తాజాగా విడుదలైన ‘అఖండ 2’ ఫైనల్ బాక్సాఫీస్ రిజల్ట్పై అందరి దృష్టి నెలకొంది.
