వైట్‌-కాలర్‌ జాబ్స్‌ డౌన్‌

దేశవ్యాప్తంగా వైట్‌-కాలర్‌ ఉద్యోగ నియామకాలు తగ్గుముఖం పట్టాయి. ఈ ఏడాది తొలి నెలలో ఈ నియామకాలు 11 శాతం తగ్గినట్లు ఓ నివేదిక వెల్లడించింది.

• జనవరిలో 11 శాతం తగ్గిన రిక్రూట్‌మెంట్లు

ముంబై, ఫిబ్రవరి 6: దేశవ్యాప్తంగా వైట్‌-కాలర్‌ ఉద్యోగ నియామకాలు తగ్గుముఖం పట్టాయి. ఈ ఏడాది తొలి నెలలో ఈ నియామకాలు 11 శాతం తగ్గినట్లు ఓ నివేదిక వెల్లడించింది. ఏడాది ప్రాతిపదికన జనవరి నెలలో ఐటీ రంగంలో ఉద్యోగ అవకాశాలు 19 శాతం తగ్గినట్లు, అయినప్పటికీ హెల్త్‌కేర్‌, ఆతిథ్య, ఎఫ్‌ఎంసీజీ రంగాల్లో మాత్రం పెరిగినట్లు నౌకరీ జాబ్‌స్పీక్‌ ఇండెక్స్‌లో వెల్లడించింది. నెలవారి జాబితాలో భాగంగా గత నెలకుగాను విడుదల చేసిన నివేదికలో కృత్రిమ మేధస్సుకు సంబంధించి మెషిన్‌ లెర్నింగ్‌ ఇంజినీరింగ్‌, ఏఐ సైంటిస్ట్‌ ఉద్యోగ నియామకాలు 46 శాతం, 23 శాతం చొప్పున పెరిగాయి. వార్షిక ప్రాతిపదికన హెల్త్‌కేర్‌ రంగంలో ఉద్యోగ కల్పన 7 శాతం అధికమవగా, వీరిలో అడ్మినిస్ట్రేటివ్‌ రోల్‌ సిబ్బందికి అధిక డిమాండ్‌ నెలకొన్నదని పేర్కొంది.

దేశీయ, అంతర్జాతీయ పర్యాటక రంగం అంచనాలకుమించి దూసుకుపోతుండటంతో ఈ రంగంలో ఉద్యోగ నియామకాలు అంతకంతకు పెరుగుతున్నాయని, ముఖ్యంగా గత నెలలోనూ 5 శాతం పెరిగాయని తెలిపింది. ముఖ్యంగా రెస్టారెంట్‌ మేనేజర్లు, సర్వీసు మేనేజర్లకు బెంగళూరు, ముంబైలలో డిమాండ్‌ ఎక్కువగా ఉన్నదని పేర్కొంది. మరోవైపు, బీపీవో రంగంలో నియామకాలు 16 శాతం తగ్గగా, బీమా రంగంలోనూ 8 శాతం తగ్గాయని పేర్కొంది. అలాగే విద్య, రిటైల్‌ రంగంలో కూడా 7 శాతం చొప్పున తగ్గాయి. ఈ సందర్భంగా నౌకరీ.కామ్‌ చీఫ్‌ బిజినెస్‌ అధికారి పవన్‌ గోయల్‌ మాట్లాడుతూ.. కృత్రిమ మేధస్సుతో కూడిన ఉద్యోగాలు పుంజుకోవడం ఐటీ రంగం పూర్తిగా మార్చివేసిందని, హెల్త్‌కేర్‌, ఆతిథ్య, ఎఫ్‌ఎంసీజీ విభాగాల్లో నియామక సెంటిమెంట్‌ ఆశాజనకంగా ఉన్నదన్నారు.