తీపిక‌బురు : 8.7 శాతానికి త‌గ్గిన నిరుద్యోగ రేటు

న్యూఢిల్లీ : ప‌లు రాష్ట్రాల్లో క‌రోనా నియంత్ర‌ణ‌లు స‌డ‌లించ‌డంతో దేశంలో నిరుద్యోగ రేటు ఆరువారాల క‌నిష్ట స్థాయిలో 8.7 శాతానికి త‌గ్గింది. ప‌ట్ట‌ణ ప్రాంత నిరుద్యోగం తాజా వారంలో 9.7 శాతానికి త‌గ్గ‌గా, గ్రామీణ నిరుద్యోగం 8.2 శాతానికి ప‌డిపోయింద‌ని సెంట‌ర్ ఫ‌ర్ మానిట‌రింగ్ ఇండియ‌న్ ఎకాన‌మీ (సీఎంఐఈ) వెల్ల‌డించింది. మేలో 14.7 శాతంగా ఉన్న ప‌ట్ట‌ణ నిరుద్యోగం ప‌లు రాష్ట్రాలు లాక్డౌన్ ల‌కు స‌డ‌లింపులు ప్ర‌క‌టించ‌డంతో జూన్ 13తో ముగిసిన వారంలో 9.7 శాతానికి త‌గ్గింది.

ఇక గ్రామీణ భారతంలో మే నెల‌లో నిరుద్యోగ రేటు 10.63 శాతానికి ఎగ‌బాక‌గా జూన్ 13తో ముగిసిన వారంలో నిరుద్యోగ రేటు 8.23 శాతానికి ప‌డిపోయింది. అసంఘ‌టిత రంగంలో క్ర‌మంగా కార్య‌క‌లాపాలు పెర‌గడంతో నిరుద్యోగ రేటు త‌గ్గుముఖం ప‌ట్టింద‌ని ఆర్థిక‌వేత్త‌లు అంచ‌నా వేస్తున్నారు. ఇక గ‌త ఏడాది క‌రోనా ముమ్మ‌ర ద‌శ‌లో ఉండ‌గా దేశ నిరుద్యోగ రేటు 23.52 శాతంగా న‌మోద‌వ‌గా ఈ ఏడాది జ‌న‌వ‌రి నాటికి ఆర్థిక వ్య‌వ‌స్థ రిక‌వ‌రీకి అనుగుణంగా 6.52 శాతానికి దిగివ‌చ్చింది.