త్వరలో ‘టీ హబ్‌ రోడ్‌మ్యాప్‌’

సంస్థాగత ఆవిష్కరణలకు 2030 పేరుతో ప్రత్యేక రోడ్‌ మ్యాప్‌ను టీ హబ్‌ రూపొందిస్తున్నదని, ఇందులో టెక్నాలజీ సంస్థలను భాగస్వామ్యం చేస్తున్నామని టీ హబ్‌ సీఈవో ఎం శ్రీనివాస రావు తెలిపారు.

హైదరాబాద్‌ సిటీబ్యూరో, జనవరి 23 (నమస్తే తెలంగాణ): సంస్థాగత ఆవిష్కరణలకు 2030 పేరుతో ప్రత్యేక రోడ్‌ మ్యాప్‌ను టీ హబ్‌ రూపొందిస్తున్నదని, ఇందులో టెక్నాలజీ సంస్థలను భాగస్వామ్యం చేస్తున్నామని టీ హబ్‌ సీఈవో ఎం శ్రీనివాస రావు తెలిపారు. టీ హబ్‌- అమెజాన్‌ వెబ్‌ సర్వీసెస్‌ సంయుక్త ఆధ్వర్యంలో 200 మంది సీనియర్‌ బిజినెస్‌, టెక్నాలజీ లీడర్స్‌తో వ్యక్తిగతంగా సమావేశాన్ని నిర్వహించారు.

ఈ సందర్భంగా సీఈవో మాట్లాడుతూ.. ఆవిష్కరణలను ప్రోత్సహించేందుకు తెలంగాణ ప్రభుత్వం ప్రత్యేకంగా కృషి చేస్తున్నదని, దీనికి అనుగుణంగానే దేశ వ్యాప్తంగా ఉన్న బిజినెస్‌, టెక్నాలజీ లీడర్లతో సమావేశమై 2030 నాటికి ఏవిధంగా ముందుకు వెళ్లాలన్న దానిపై ప్రత్యేకంగా చర్చించామన్నారు. ఇప్పటికే టీ హబ్‌- అమెజాన్‌ వెబ్‌ సర్వీసెస్‌ సంయుక్తంగా యాక్టివేట్‌ అండ్‌ స్టార్టప్‌ ర్యాంప్‌ను నిర్వహిస్తే 330 దరఖాస్తులు ఢిల్లీ, ముంబై, పాట్నా, బెంగళూరు, హైదరాబాద్‌ల నుంచి వచ్చాయన్నారు. డ్రోన్‌ టెక్నాలజీలో కొత్త ఆవిష్కరణలు చేసేందుకు అవసరమైన సహాయ సహకారాన్ని అందించేలా ఆయా పరిశ్రమలకు చెందిన సంస్థలతో కలిసి పనిచేయడంతో మంచి ఫలితాలు వస్తున్నాయని, ఇలాంటి కార్యక్రమాలను దశల వారిగా చేపడుతూనే ఉంటామని తెలిపారు.

టీ హబ్‌ స్టార్టప్‌కు రూ.40లక్షల నిధులు…
టీ హబ్‌ కేంద్రంగా కార్యకలాపాలు నిర్వహిస్తున్న స్టార్టప్‌ స్టార్‌బజ్‌ ఏఐకు రూ.40 లక్షల నిధులు సమకూరాయి. ఫ్రీ సీడ్‌ ఫండ్‌ ద్వారా వచ్చిన ఈ నిధులు కంపెనీ వృద్ధికి తోడ్పాటునందించనున్నది. ఏఐ టెక్నాలజీతో పనిచేసే ఈ స్టార్టప్‌ వ్యాపార సంస్థల బ్రాండింగ్‌పైన, మార్కెట్లో ఉండే ఇన్‌ప్లూయెన్సర్స్‌తో కలిసి పనిచేస్తుంది.